Chawlh zai rel lo Suns

NBA playoff khel tura tling hmasa ber Phoenix Suns chuan chawlh zai an rel lo, an hma a ding apiang an hneh zel a ni ber mai. Suns hian nimin zing inkhelah Minnesota Timberwolves chu 125-116 in an hneh.

Suns tan Deandre Ayton-a'n point 35 neiin season kal laiah, match khat chhunga point a neih hnem ber ṭum a tawng - rebound vawi 14 a la bawk. Devin Booker-a'n point 28 a neih zinga 22 chu second half-a a neih niin an thawh hlawk dun hle.

Regular season bikah match khelh hmabak pakua an la nei a, Western Conference hmahruaitu hian table-ah match kua ngawtin hnehna an chang hnem fal. Tun hnaiah a zawnin match ruk chhung hnehna an chang leh tawh bawk.

Match hnuhnunga an chetsual hnuah Golden State Warriors an tho chhuak leh nghal. Golden State hian Miami Heat chu 118-104 in an hneh a, hnehna an chan theih nan Jordan Poole chuan point 30 a nei.

Player pathum Damion Lee, Jonathan Kuminga leh Andrew Wiggins ten point 22 ṭheuh an nei bawk a, an khelh ṭhat rual em avangin Heat tan dan ngaihna an awm lo. Season kal laia vawi 48 an chak tlinna a ni nghal bawk.

Nimin zing inkhel dangah Los Angeles Lakers an chak lo. Lakers hi Philadelphia 76ers lakah 126-121 in an tlawm a, season kal laia vawi 42 an tlawmna a nih avangin an harh chhuak thei meuh lo tihna a ni.

LeBron James-a'n chak an mamawh thu a sawi hnu lawkah pawh an chak thei chuang lo. Western Conference table-ah pakuana an ni chhunzawm, an chung chiaha awm Los Angeles Clippers aiin match ngain an chak tlem zawk a, thil mak a thleng a nih loh chuan an tan playoff beisei ngam a ni tawh lo.

NBA - Nimin Results
Phoenix Suns 125 - 116 Minnesota Timberwolves
Orlando Magic 102 - 118 Oklahoma City Thunder
Houston Rockets 91 - 110 Dallas Mavericks
Philadelphia 76ers 126 - 121 Los Angeles Lakers
San Antonio Spurs 133 - 96 Portland Trail Blazers
Golden State Warriors 118 - 104 Miami Heat
Brooklyn Nets 120 - 132 Memphis Grizzlies