Bahrain lakah India an tlawm

June thlaa khelh tur 2023 AFC Asian Cup qualification atana inbuatsaihna inkhelah India an tlawm a, Nilaini zan khan friendly match-ah Bahrain chu 2-1 in an ngam lo.

Sh. Ali Bin Mohamed Stadium, Manama, Bahrain-a inkhelah mualneitu lamin inkhel an thunun zawk a, minute rukna lekah penalty an hlawh chhuak nghal.

Mohamed Marhoon-a shot chuan Sandesh Jhingan-a kut a per a, penalty an chawi. Mahse, India tan captain armband hrengtu keeper Gurpreet Singh Sandhu chet ṭhat zan a ni a, Mahdi Humaidan penalty pet chu a dang.

Mahse, India aiin Bahrain an ṭha zawk a, Gurpreet-a'n a dang reng seng bik lo - minute 37-naah Mohamed Al Hardan chuan goal hmahruai a rawn khung a, goal khatna chauh ni mah se result tur a hriatthiam theih deuh nghal.

Second half-ah India-in bul ṭan ṭha zawk mah se Roshan Naorem Singh chuan a chance neih duhawm a chhawr thei lo a, Bahrain-in inkhel an thunun chhunzawm.

Blue Tigers-in awlsam taka inpek mai erawh an tum bik lo - Roshan-a corner aṭanga ball kal chu Rahul Bheke chuan minute 59-naah si phurh sut nan a tauh lut a, ram tana a goal hmasa ber a khung.

Mahse, India an tho thei lo - Bahrain bawk an hlauhawm chhunzawm a, inkhel ṭantir lama chance duhawm vawi tam hlahtu Mahdi Humaidan-a'n a hmingchhe lutuk tur thup nan minute 81-naah a khung ve leh a, he goal hi Bahrain-in an chakpui.

India probable squad-ah Mumbai City forward Lallianzuala Chhangte, midfielder Lalengmawia (Apuia), Odisha player pawimawh Jerry Mawihmingthanga leh Jamshedpur defender Laldinliana Renthlei te koh an ni a, final squad-ah erawh Mizo an awm lo - Dinliana hian hliam vangin camp a zawm lo hrim hrim.

Nilaini zan inkhelah India chak zo lo mah se footballer ṭhenkhat tan erawh zan chhinchhiah tlak a ni a, Bengaluru midfielder Danish Farooq leh NorthEast United forward V. P. Suhair te chuan inkhel bul ṭanin ram tana an match hmasa ber an khel.

Hun pek belh minute thumnaah centre back Anwar Ali pawh luhtir a ni a, lung lam fel lo avanga inkhel thei tawh lo tur ang hiala sawi hlawh hman defender tan chuan hriatreng tawh tur inkhel a ni.

Kum 21 mi defender hian a chawlh lai khan Himachal Football League club Techtro Swades United thlengin a khel hman a, mahse, tun season-ah FC Goa tan ISL-ah a rawn kir a, beiseina a nei sang leh tawh hle.

Manipur fullback Naorem Roshan Singh chu bench aṭangin luhtir a ni bawk a, Bengaluru defender hian second half-ah Liston Colaco a thlak.

Blue Tigers hian Inrinni zan dar 9:30-ah Belarus chu friendly match an khelhpui leh dawn a, an tlawm leh a nih ngat chuan coach Igor Stimac duhkhawp lohna a ri ring lehzual khawp ang.

March 23, Nilaini Zan
Bahrain 2 - 1 India
BAH: Mohamed Al Hardan 37'; Mahdi Al- Humaidan 88'
IND: Rahul Bheke 59'
March 26, Inrinni Zan

India 9:30 PM Belarus

INDIA:
Gurpreet Singh Sandhu (captain); Pritam Kotal (Anwar Ali – 90+3 – international debut), Rahul Bheke, Sandesh Jhingan, Subhasish Bose; Manvir Singh, Danish Farooq (international debut) (Yasir Mohammad – 79th), Pronay Halder, VP Suhair (international debut) (Anirudh Thapa – 56th), Liston Colaco (Roshan Singh – 46th – international debut), Rahim Ali (Aniket Jadhav – 79th).