Srikanth leh Saina an chak

Badminton inelna Swiss Open khelh laiah Kidambi Srikanth leh Saina Nehwal te chuan singles huanga an match hmasa berah hnehna an chang. Mipa doubles lamah Chirag Shetty leh Satwiksairaj Rankireddy te pawhin hnehna nen bul an ṭan ve bawk.

World number 1 hlui Srikanth-a'n a khingpui Mads Christophersen chu straight games-in a hneh, minute 32 chhung lekin Danish player lakah hian 21-16, 21-17 in hnehna a chang.

Mipa singles inkhel dangah Parupalli Kashyap pawhin Enogat Roy chu 21-17, 21-9 a hnehin second round a lut. Indian player pahnih inkhelah H. S. Prannoy chuan minute 48 chhungin B Sai Praneeth 25-23, 21-16 in a hneh ve bawk.

Mipa doubles hian ngaihven a hlawh. Chirag Shetty leh Satwiksairaj Rankireddy te ṭangdun in an hmachhawn Muhammad Shohibul Fikri leh Bagas Maulana te hi, kar hmasa lawka All England champion an ni.

Mahse, Indian tlangval pahnih hian game hmasa ber hloh mah se 17-21, 21-11, 21-18 in hnehna an chang. Indonesian duo lakah seeded pathumna Shetty leh Rankireddy te an zam lo a, an huaisen rah an seng.

Hmeichhe singles lamah Saina a khel ṭha. London Olympic bronze medalist hian Yaelle Hoyaux chu 21-8, 21-13 in a sawp. Indian nula Ashmita Chaliha pawh dinhmun hniamah ding hman mah se, tho chhuak lehin LeOnice Huet chu 19-21, 21-10, 21-11 in a hneh.