IPL 15-na CHIBAI
Ṭhangkhat lian zet mai, harsatna leh hrileng karah pawh chhum lo chat loa Board of Control for Cricket in India in, a rangkachak tûi chhuaktu inelna a lo huaihawt ṭhin, Indian Premier League chu kan nghakchhuak leh ta reng mai. A hmasain he Cricket Game ngainatute, Ṭhal Kutpui chibai Vanglaini kaltlangin ka buk vek a che u.
Tata, Goenka leh Sap Mi Hausa an lo penchhuak.
Vivo lam Sponsorship lama an inhnuhdawh tak avangin, India rama Company lar ber Tata rawn pen chhuakin, kum 2 chhung atan cheng vaibelchhe 670-in BCCI nen inremna siamin TATA Indian Premier League tih hming a pu tawh ang. ṭ
Anni bakah hian cheng vaibelchhe 100 chuang ṭheuha lo puibawm turin TV Sponsor 15 leh Digital Sponsor 13 awmin, chung zingah chuan khawvela brand lar tak tak - Pepsi, Dream 11, Parle Agro, L'oreal, Phone Pe, Asian Paints tih te an kat nuk bawk.
Tin, team thar Lucknow Super Giants neitute hi India rama sumdawng hausa Goenka Chhungkua te conglomerate company RPSG Group ta ni in, Gujarat Titans hi Kumpinu ram investment company lar CVC Capitals te ta a ni thung.
TV lama kan entheihna tur hian 2017 kuma, kum 5 chhung atana BCCI Media Rights cheng vaibelchhe 6000/ chuanga Star Sports-in a chhana kha la kal zelin, Star Sports Channel lamah cricket khawvel mit a leng leh dawn a ni ber awm e.
Maharastra - Maha IPL
Khawvel chhaihbuaitu Covid hrileng avang hian IPL hian harsatna a tawk lo bik nilovin, tun season 2 liamta kha chu, UAE lamin he khawmpui hi an thleng a ni ber a. Tun tumah erawh, BCCI lamin India rama nghah ngei a tum ruh hle a, siamrem ngai tamtak erawh a awm tih hairual a ni lo.
Tunhma anga mahni khelmual leh khawpui a, home and away a intlawh tawn zak zak ngai lovin, India rama State hausa tak Maharastra khawpui Mumbai khua Stadium hmingthang 2, Wankhede leh Brabourne leh Navi Mumbai a Stadium ropui zet mai DY Patil Stadium (Fifa Under 17 World Cup lo thleng tawh tu kha) leh Pune khua a MCA International Stadium te hian group stage inkhel awm zawng zawng thleng turin, inkhawmpui pandal an zarna hmun tur te chu a ni ta. A remchan dan angin, IPL committee lamin Knock Out stage khelhna tur chu an la ruahman leh dawn ni awm tak a ni.
Team 10/ Group 2, Khawlum
Ṭum danga team 8 inelna ni ṭhin kha team thar pahnih an tel belh avangin team 10 inelna tur league a lo ni dawn ta. Amaherawhchu, group pahnihah inṭhenin, seeding pek an ni.
Group khatah team panga ve ve a ṭhen ni in, team tinin an group a an awmpui team dang pali te vawi hnih ṭheuh hmachhawnin, group lehlama mi team 1 tum 2 hmachhawn bawkin, a bang dang team 4 te vawi khat chauh tumin, team 10 te hian ṭum 14 ṭheuh inkhel an hmachhawn ang.
Nipui thli a lo thaw ṭan a, Maharastra state khawluma, a daih rei rei dinchhana tournament te pawh a ni hmel viau e.
Bio Bubble nun
He thla hnih zet awh tur inelnaah hian, Covid vangin pawnlam khawvel nen inchiahpiah a thiang dawn loh avangin team 10 te khualbuk atan Mumbai a 5 star Deluxe Hotel lar ho chu book fel an ni tawh.
RCB lamin an iptepui bannan Taj Lands End hmangin, Mumbai Indians-in Trident an thlang fel a. KKR lamin ITC Central book felin, Delhi Capitals lam Taj Mahal Hotel ah an inpulut fel tawh bawk.
CSK lam Trident Nariman Point ah inkhuarin, Sunrisers Hyderabad hovin ITC Maratha chu an bedding phelh nan an hmang thung a. Gujarat Titans in JW Marriot khualtha chan an chang anga, Rajasthan Royals lamin Grand Hyatt lamah mutmu an tuah ve thung ang. Priety Zinta-i hote Kings 11-in Reniassance Hotel thlangin, Team thar Lucknow te thlengtu atan Taj Vivanta te an inbuatsaih thung.
Happy Weekend
Inkhawmpui palai lawm zanah, inkhel khuh hawng turin champion nomawi humhim tum Dhoni leh a hote CSK leh Bollywood Superstar Shah Rukh Khan a naute, team huhang ngah tak KKR ten tun Inrinni zan dar 7 a ṭan turin, Wankhede Stadium-ah an han inkhuainuai tan dawn a ni.
BCCI lamin stadium a mipui en thei zat 100 zelah 25 chauh thuthna a rem avangin, a hmuna en tumte tan pawn thil khirh a ni dawn a. Engpawh chu nise, kan awmna hmun ṭheuh aṭangin he cricket khawvel nghahfak, IPL 15-na chibai hi ka buk nawn leh vek a che u.
Silly Point
- K. Vanlalruata