Chelsea-in ticket an hralh thei tawh dawn!

United Kingdom sorkarin Roman Abramovich a hrek avanga Chelsea-in ticket an hralh theih loh chu UK sorkar chuan a hlihsak a, mahse, Blues tan thawk huaina tur khawp erawh a ni lo.

London club-in ticket an hralh theih tur hi away game, cup match leh hmeichhe inkhel tur atan a ni - an khelmuala league match khelh turah chuan away fans lei tur chiah an zuar thei ang.

Chelsea hian Stamford Bridge-a league match khelh tur atan chuan anmahni fans tan ticket an la hralh chhuak thei dawn chuang lo tihna a ni a, hetihrual hian khualmuala league match an neih apianga ticket an hralh theih loh chu an hralh thei tawh dawn a, khualmualah fan-ten an ṭawiawm thei tawh dawn tihna a ni.

Stamford Bridge-a league match-ah chuan Abramovic hrem a nih hmaa ticket lei leh season ticket neite chauhin an la ṭawiawm thei dawn a, cup match ticket an hralh theih avangin Champions League quarterfinal leh FA Cup semifinal atan ticket an hralh thei dawn thung.

An chhawrna tur
Stamford Bridge-a league match khelh tur atan Chelsea-in ticket la hralh thei lo mah se a êng zawnga thlir chuan cup match ringawta ticket hralh theih pawh hi thu lawmawm a tling a, a bik takin an hmabak match thlir chuan a hlu lehzual.

Chelsea hian April 16 zanah Real Madrid nen Champions League quarterfinal first leg an khel dawn a, European club ṭha an mikhual zanah fans an ngah tawk loh a hlauhawm laiin ticket an hralh thei dawn - stadium khat loa inkhel reng tawh an nih avangin an boruak a ṭhat phah dawn.

Hei chauh a ni lo - April 16-ah FA Cup semifinal chu Wembley Stadium-ah Crystal Palace nen an khel dawn a, Chelsea hian a hma angin ticket hralh thei lo ngat se Palace lakah an inkhel boruak a dang ngei ang.

Mahse, tunah chuan fans ho ṭawiawmnain Wembley Stadium an mawi thei tawh dawn tihna a ni a, Chelsea tan chuan thu lawmawm a tling. Premier League-a khualmuala fans neih tlem lutuk a zia tur ringawt pawh hi hlimpui tham a ni.

Ticket hralh loh chhan
UK sorkarin Abramovich a hrek chhan ber chu Russia-in Ukraine a run vang a ni a, Chelsea neitupa hi Russia presient Vladimir Putin-a ṭhian hnai tak a nih bawk avangin che thei loa siam hi UK sorkar duh dan a ni.

Abramovich hrek a nih rualin Chelsea an buai tel a, UK sorkarin Russian mi hausa hi a sum lakluh tam tak tih bosak an duh avangin an ram chhung a sumdawnna aṭanga sum lalut lo turin an duh.

Hei vang hian Chelsea hian an tuar tel lo thei lo a, club staff, coaching staff leh player hlawhte a ngai rengin kalpui ni mah se hlawkna an hmuh theihna tur chu tihtawp vek a ni a, chung zinga langsar tak chu ticket hralh a ni.

Chelsea-in ticket an hralh theih loh hian club-in sum a hloh a ni ringawt lo a, Abramovich-a'n sum a hloh tel tihna a ni - chu chu UK sorkarin a duh ber a ni a, tunah pawh ticket hralh phal mah se Chelsea hian a hlawkna an tel dawn chuang lo!

Engtin maw?
Uk sorkarin Abramovich hrek si a, Chelsea fan-ten an tawrh loh dan tur an ngaihtuah a ni ber a, Blues ṭantuten inkhel an en an duhsak em em lai hian, ticket an lei avanga hlawkna awm chu Chelsea-in an tel loh an duh.

Hei vang hian ticket an hralh aṭanga sum hmuh chu Chelsea khingpui club leh inelna huaihawttu kutah a lut ang. Chelsea fan-ten khualmuala inkhel en tura ticket an lei aṭanga sum hmuhte pawh an khingpui club-in an dawng zel dawn tihna a ni.

Chelsea hian ticket hralh aṭanga an club dawn tur sum an dawn dawn loh rau rau chuan, ticket hralh aṭanga sum hmuhte chu Ukraine-a indona tuartute tana hlan turin an ngen.

Premier League lam chuan club nen inbe rawn chungin, league ticket hralhna aṭanga club sum hmuhte pekchhuah dan tur chu mipui hriata an puan zar thuai tur thu an sawi a, Chelsea duhdan hi ngaih pawimawh sak an nih a rinawm.

Sorkar ngaihdan
Nilaini zan khan Chelsea-in ticket an hralh theihna tur dan hi Office of Financial Sanctions Implementation (OFSI) chuan an tichhuak a, UK sports minister Nigel Huddleston chuan Chelsea ṭantute hre reng chunga thutlukna chu siam an nih thu a sawi.

Huddleston chuan, "Football thuneitute nen ngaihtuahna kan sen laia, dawhthei taka min lo nghaktu fan-te chungah lawmthu ka sawi a ni," a ti a, ticket hralh theih loh chhunga Blues ṭantute dawhtheihna chu a fak.

UK sports minister chuan sawi zawmin, "Vladimir Putin hnimhnaitu zinga Roman Abramovich a tel avangin UK sorkar chuan Abramovich chu a hrek zingah a telh a.

"Abramovich hrek a nihna hi club-in tuar lo a, Abramovich chauhin tuar chunga hremna kalpui a nih theih dan tur hi sorkar chuan a ngaihtuah reng a ni," a ti a, sorkar tan pawh thutlukna siam awlsam a nih loh thu a sawi.