Miami lamah Osaka a chak

Naomi Osaka chuan Indian Wells lama a result chhe tak hliah khuh ngei a tum. Miami Open a match hmasa berah hnehna a chang nghal a, inkhel turin a rilru pawh a inpeih tawh thu a sawi tel bawk.

Nilaini zan inkhelah Osaka hian Astra Sharma chu 6-3, 6-4 in a hneh. Indian Wells lama auh nawmnah a tawh aṭanga ni 10-naah tennis court-ah a kir leh a, set hloh loa hnehna chan theih hi a tan thil lawmawm a ni ang.

Kum 24 mi Osaka chuan, "Eng pawh lo thleng se ka nun tibuai turin ka duh lo, a bik takin tennis ka khelhna hi chu engmahin a tibuai tur a ni lo. Tun hma ang khan ṭha takin ka la khel thei a ni tih hi a taka lantir ka tum.

"A nihna tak sawi chuan Indian Wells ka mangṭha dan kha chu a nuam lo. Khami hnuah khan rilru leh taksa ti chak thar leh turin hma ka la chhunzawm a, a rah chhuah pawh kan hmu ngei turah ka ngai," a ti.

Grand Slam vawi li champion tawh Osaka hian WTA 1000 tournament-ah match 50 a chak tling ta chiah, a match lehpekah chuan Angelique Kerber a hmachhawn ang. German nula Kerber hi major title pawh la tawh a nih avangin a awlsam lo mai thei.

Inkhel dangah Heather Watson pawh a chak ve khiah. British nula tan Miami Open hi hmun ṭha a ni ngai lo, kum ruk chhung chu hneh nei loin a tla. Tun ṭumah erawh world number 75 Arantxa Rus a hneh.

Rus-i nen hian an inkhel tawk viau a, darkar thum leh minute 25 an inkhelh hnuah Watson hi 6-7 (5-7), 7-5, 6-4 in a chak. Set hnihna bikah hian 4-1 in hniam hman mah se huaisen takin a bei let a, set hnuhnung ber nen a la zui.

Kum 29 mi Watson hian a match lehpekah chuan Elina Svitolina a hmachhawn ang. Ukraine nula hi seeded 15-na a ni phak a, awlsam taka paltlang theih chu a ni dawn lo, tlang tur chuan thapui thawh bakah vanneih a mamawh tel ang.