Usyk-a'n Joshua hmachhawn turin Ukraine chhuahsan

World heavyweight champion Oleksandr Usyk chuan Anthony Joshua nen an inhnek dawn avangin Ukraine a chhuahsan a, boxer pahnih hi June-a inhnek tura ruahmanna siam a ni.

Ukrainian boxer hian September khan khawvel barakhaihin Joshua a hneh a, British boxer-in a kawl lai WBA (Super), IBF leh WBO heavyweight title chu a chhuhsak.

Boxer pahnih hi inhnek leh tura tih an ni a, a tirah April chu ruahman a ni. Mahse, Joshua-a'n trainer thar a zawng rei hret a, WBC champion Tyson Fury nena inbiakna an neih chuan a tikhawtlai bawk.

Hei vang hian May chu ruahman leh a ni a, mahse, Russia-in Ukraine a run avangin a hun sawn a ni leh a, Usyk hian an ram chhuahsanin inhnek hi a hmachhawn dawn ta niin a lang.

Tottenham Hotspur Stadium-a unanimous decision hmanga Joshua hnehtu Usyk hi Russia-in an ram a run khan a awmna ngaia awm mai loin Ukraine-ah a kir a, Russia bei let turin an ram sipaiah a inziak lut a ni.

Kum 35 mi boxer hian, "Hlauhna pakhatmah ka nei lo," tiin Ukraine sipaia a inpektirh khan a sawi a, Joshua tan tun ang boruak kara hmachhawn hi thil châkawm lutuk a ni kher lo mai thei.

Ukrainian boxer zingah Russian sipai do let tura inpe an awm nual a, weight division pathum champion Vasiliy Lomachenko pawh Russia bei turin a lo inpe tawh a, unau lar tak Vitali leh Wladimir Klitschko pawh an bang lo.

Kum 50 mi Vitali hi an ram khawpui ber Kyiv mayor a ni a, kum 2014 aṭang khan a ni tawh - a unaupa Wladimir hi kum 45 mi ni tawhin, thla hmasa khan an ram sipaiah a inpe ve bawk. Unau boxer-te hi a hunlaia world heavyweight champion ropui ve ve an ni.