Final-ah Aizawl East I Derby

Legrand Cup, MFA Futsal 2021-22 Season Opening Tournament chu zanin hian final khelh a ni dawn a, Division One final-ah Aizawl East I derby kan hmu dawn a - Muthi FC leh Goshen FC, Sihphir Venghlun an inhmachhawn dawn.

KK Futsal Ground, Durtlang Leitan-a khelh mek inelnaah hian League Club lama final-a intum turte kan hre hman lo thung.

Nimin tlai khan semi final hmuhnawm chungchuang pahnih kan hmu.

Inkhel hmasa zawkah Muthi FC leh Armed veng South FC an inhmachhawn a, team pahnih hi an insan chhawk zak zak a, a tawp dawn thlengin an inhnehtawk a, a tawpah Muthi 6-5 in an chak a, final an lut.

Fitness nei ṭha bera chhal ngam Goshen FC, Sihphir Venghlun leh player nei ṭha bera chhal ngam Thlangtiang FC inkhel hi futsal ngainatute tana inkhel hmuhnawm tling a ni a, a tawpah Goshen FC 5-3 in an chak ta zawk a ni.

Division One final hi zanin dar 6:30-ah KK Futsal Ground-ah khelh a ni ang a, he mi zawh hian League Club lamin final an khel zui ang.