South America aṭanga World Cup khel tur a chiang

Uruguay chuan nimin khan Peru chu 1-0 in an hneh a, World Cup khel turin an inpetkai - Uruguay tan Giorgian De Arrascaeta chuan inkhela goal awmchhun a khung a, Peru-in a chhanletna tur an nei lo.

Ecuador-in khualmualah Paraguay chu 3-1 in ngam lo mah se Uruguay leh Brazil chak zar zoin an tlang ta tho a, South America aṭanga World Cup khel tur a chiang kim ta tihna a ni.

Uruguay leh Ecuador an tlin hma hian Brazil leh Argentina chu World Cup khel turin an lo tling tawh bawk a, Peru, Colombia leh Chile ten inter-confederation playoff hmun chan theih an la inbeisei.

Brazil chuan Qatar-ah pawh tum an châkawm dawn lo tih pholangin Chile chu 4-0 in an hneh a, Colombia chuan playoff beiseina an la neih chhi nung turin Bolivia chu 3-0 in an hneh bawk.

Uruguay an tling
Nimina Uruguay leh Peru intawn hmain, team pahnih inkarah point khat chauh a awm a, inkhela chak zawk tan World Cup khelhna kawngka a inhawng - boruak a sang hle.

Uruguay hian qualifier-ah beisei an phak loh avangin kum 15 zet an coach lo ni tawh Oscar Tabárez chu an ban hial a, hetihlai hian match li chhung chu a zawnin an tlawm tawh.

Qatar-a zin ngei duhin Uruguay-in Diego Alonso an lalut a, kum 46 mi coach hian match hnih a zawnin hnehna a chanpui a, "Final angin kan khel ang," tiin Peru nena an inkhel tur a thlir hial.

Nimin khan team pahnih an intawng ta ngei a, a ngam pawh an inngam tawn hle - a tirah Peru an ngampa zawk a, minute ngana lekah Gianluca Lapadula chuan uiawm takin a tauh goal lo.

Team ṭha zawk
Peru-in Uruguay thin phu an tirang a, mahse, Luis Suarez hoa khel team hian zam mai an tum lo a, chance duhawm tia sawi theih an neih hmasak berah goal an khung nghal.

Jose Giménez chuan minute 42-naah goal post a tih per a, a per lehlam chu De Arrascaeta chuan goal hmahruai ni turin a khung a, Uruguay tan chakna goal a ni zui nghal ta a ni.

Uruguay tan Federico Valverde chuan an goal hnihna khungna remchang a nei a, mahse, kum 23 mi midfielder shot hian bar a per - goal ngat se goal nalh bik ni tur a ni a, Real Madrid midfielder Valverde vanneih zan a ni lo.

Peru-in World Cup khel turin chak an mamawh a, mahse, si khat leka an hnufual chungin si phurh sutna tur goal an hlawh chhuak thei lo a, hun pek belhah Miguel Trauco chuan a hun neih a chhawr ṭangkai lo - Uruguay an chak a, an tlang.

Chak lo mah se...
Table-a pathumna ni lai Ecuador-in World Cup khel turin chak an mamawh a, Paraguay lakah chiang takin an tlawm thung. Mahse, Uruguay an chak miau a, match khat khelh tur la nei chungin Ecuador an tlang ta tho.

Paraguay tan Robert Morales chuan minute kuana lekah goal hmahruai a khung a, first half hun pek belhah Ecuadorian defender Piero Hincapié chuan an lamah a tilut bawk.

Chawlhlawk hman a nih hnuah pawh beisei tur nei tawh lo Paraguay bawk an che ṭha a, Newcastle United attacking midfielder Miguel Almirón chuan an goal thumna a khung.

Ecuador mualpho lutuk tur khuh nan Jordy Caicedo chuan minute 85-naah penalty aṭangin a khung ve leh a, 3-1 a tlawm chungin World Cup khel turin an tling - Paraguay defender Blas Riveros chu minute 88-naah hnawhchhuah a ni.

Goal a sur
World Cup khel tura tling chiang tawh Brazil-in inthlahdah phah an tum lo a, an mikhual Chile chu 4-0 ngawtin an sawp. Brazil tan hian Neymar, Vinícius Júnior, Philippe Coutinho leh Richarlison ten goal khat ṭheuh an khung.

Brazil tan Neymar chuan minute 44-naah penalty hmangin goal hmahruai a khung a, first half hun pek belhah Vinicius khung tur a siamsak zui - Real Madrid forward tan Brazil jersey ha chunga a goal khung hmasak ber a ni.

Kum 21 mi Vinícius hian Brazil tan match 12 a khelhna a ni a, goal a khung belh zel an beisei ang - tun season-ah Real tan match 39-ah goal 17 a khung tawh a, season khatah heti zata tam goal a la khung ngai lo.

Second half-ah bench aṭanga luhtir player pahnihin goal an khung ve leh a, Aston Villa lama intuaithar mek Coutinho chuan minute 72-naah penalty hmanga an goal thumna khungin, Richarlison chuan hun pek belhah goal lina a khung bawk.

Colombia beiseina
A sang pali zinga tel a, World Cup khelh beiseina Colombia tan awm tawh lo mah se inter-confederation playoff hmangin hmun ruak pakhat an la beisei thei tih an hria a, Bolivia chu 3-0 in an sawp.

Los Cafeteros (Colombia) tan Liverpool forward Luis Diaz chuan minute 39-naah goal hmahruai a khung a, ram tana a che vel hi Colombia chauh ni lo, Reds fan-te pawhin hmuhnawm an tikhawp ang.

Colombia hian an duhtawk mai lo - second half-ah Colombian club Junior forward Miguel Borja leh Porto midfielder Mateus Uribe te chuan goal khat ve ve an khung ve leh a, 3-0 in an chak.

CONMEBOL table-a pangana hian inter-confederation playoff an khel dawn a, hetah hian AFC World Cup qualifier fourth round-a chak zawk nen an inkhel dawn a ni.