Argentina team zingah Aguero

Hrisel lohna vangin Sergio Aguero-a'n inkhelh a chawlhsan a ngai a, khelmual chhungah hman tlak ni tawh lo mah se Argentina coach Lionel Scaloni chuan team zinga tel turin a la duh.

Aguero hi Qatar World Cup khelh hunah Argentina team feh chhuak zingah a tel dawn tih chu sawi a ni tawh a, a hna thawh tur tak erawh sawi chian a la ni lo. Argentina Football Federation chuan a zin tur thu chu an sawi tawh thung.

Coach Scalini chuan tun hnai khan Aguero chungchang sawiin, "Kan coaching staff zingah hian player nena inpawh tak tak an awm, chung zingah chuan Kun pawh a tel thei ang.

"Harsatna leh buaina a thleng thei a, thil ṭha lam pawh a ni thei bawk. Player leh kan inkara awm turin ka duh a, ṭangkai takin hna a thawk thei ngei ang tih ka ring tlat a ni," a ti.

Aguero hian World Cup vawi thum a khel tawh. Manchester City tana vanglai a hman hnuin Barcelona a pan a, mahse thawk lama harsatna a neih avangin a inkhelh zui a rem ve tawh lo.

World champion vawi hnih ni tawh Argentina hi Qatar World Cup khel turin an tling chiang tawh a, an captain Lionel Messi tan pawh player a nih chhunga a World Cup hnuhnung ber a ni tawhin a rinawm.