Wales beiseina siamtu Gareth Bale

Real Madrid-ah hliam vangin buai ṭhin mah se ram tana koh a nih chuan Gareth Bale a danglam ṭhin a, khawvela footballer man to ber lo ni tawh hian Wales jersey a hak chuan mi danglam min hmuhtir ṭhin.

Ningani zan World Cup qualifier-ah pawh Bale-a'n a thiam thil min hmuhtir a, Wales tan goal hnih a khung a, Austria lakah an ram chu 2-1 in hnehna a chanpui.

Wales hian Scotland leh Ukraine inkhela chak zawk chu playoff final-ah an hmachhawn leh ang a, final-ah hian an chak leh a nih chuan World Cup khel turin an inpetkai dawn a ni.

Russia-in Ukraine a run avangin playoff semifinal lehlama Scotland leh Ukraine inkhel tur hi a hun sawn a ni a, June thlaah inhmachhawn tura beisei an ni.

Wales an phur
Cardiff City Stadium-a inkhelah an ram team ṭan turin Wales fans an pungkhawm hnem a, thawm pawh ṭha tak a ni - mipui thawm ṭhat tluk zetin Wales-in bul an ṭan ṭha a, inkhel ṭantir aṭangin na takin an nawr nghal.

Second 80 chiah an khel hman tihin Connor Roberts leh Aaron Ramsey hnathawh ṭhat zarzoin, Daniel James chuan Austria keeper Heinz Lindner a enchhin nghal a, mahse FC Basel keeper hian a lo dang thung.

Austria an zam bik lo. Bayern Munich midfielder Marcel Sabitzer chuan Christoph Baumgartner tan ball duhthusam a siamsak a, mahse, Hoffenheim midfielder hian hun thawl a nei chungin a hun ṭha neih a chhawr lo.

Wales an nghin phah lo - tlarhmaa Bale, Aaron Ramsey, Daniel James leh Harry Wilson inkawp an hmuhnawm takzet a, Austria tlarhnung tan hna hautak siamtu an ni.

Hei le Bale
Real Madrid tan tun hnai thla ruk chhungin Bale-a'n darkar hnih chiah khelmual a la rap a, Austria nena an inkhel tur pawimawhah Tottenham Hotspur forward hlui hi a in 'fit' tawk ring lotu an tam hle.

Mahse, Madrid khawpuia hlim lo forward hian a hmangaihte kiangah chuan a thiam a la theihnghilh lo a, yard 25 vela hla aṭangin mawi zetin freekick hmangin a khung - player class bik ke aṭanga chhuak a ni a, a mawi takzet.

Chawlhlawk hmain Wales tan Ramsey chuan an hmahruaina goal belhchhahna remchang a nei a, mahse, Linder a paltlang thei lo - goal dang lut loin chawlhlawk hman a ni a, second half-ah pawh Bale bawk a langsar nawn.

Second half ṭan aṭanga minute rukna lekah Ben Davies chuan Bale tan a siamsak a, Real forward hian a hlah lo - Wales goal hnihna a khung a, ram tan match 101-a goal 38 a khungna a ni.

Austria an harh
Bale-a ropuina hmaah Austria an zuai a, ngawih reng erawh an tum bik lo - minute 64-naah Sabitzer chuan Austria tana beiseina siam turin a khung ve leh a, 2-1 a ni.

Hun a la awm avangin Wales fans an hlauthawng a, Austria an phur thung. Mahse, mahni mualah Wales tlarhnung an ṭang khawng tlat a, team ṭha pangngai tak Austria-in chance awmze nei siam an harsat.

Wales hian chance nei lo zui tawp erawh an ni lo - James chuan chance duhawm vawi hnih ngawt a nei a, mahse, Leeds United winger hian goal-ah a chantir thei lo.

Hun tawp thlengin goal dang a lut tawh lo a, kum 1958 hnua a vawi khat nana World Cup khel thei dinhmunah Wales an ding mek - mimala lawmthu hrilh tur an neih chuan a hming chu Gareth Bale a ni e.