World Cup khel turin Japan an tling
Asian football-a ram ropui ber pawl Japan chu World Cup khel turin an inpet tling ve leh ta - Ningani khan Australia chu Kaoru Mitoma goal hnih hmangin 2-0 in an hneh a, Qatar pan turin an inbuatsaih ṭan thei tawh ang.
Australia erawh an tlawm avangin inter-confederation playoff chu an beisei theih san ber a ni ta a, Saudi Arabia chuan Japan chak zar zoin World Cup an khel dawn chiang ve ta bawk.
AFC hnuaia World Cup qualifier hi first round aṭangin khelh ṭan a ni a, tuna an khelh hi third round a ni - third round-ah hian team 12 la awmin, group pahnihah, team paruk ve ve awmin ṭhen hran an ni.
Team paruk hi an inkhelh kual vek hnuah group pahniha a sang pahnih ve ve chu World Cup khel turin an tling a, pathumna ve ve chu playoff-ah an intawng leh dawn - Japan leh Saudi Arabia an tlin hma hian group A aṭangin South Korea leh Iran chu World Cup khel turin an lo inpettling tawh.
Minamino vanduaina
Japan-in World Cup khel turin Australia lakah chak an mamawh a, Socceroos tan Qatar pan turin hnehna chan ngei ngei a ngai bawk - an tlawm thiang lo.
Mahni muala khel tur an nih bawk avangin Australia chu chak tura rin hlawh zawk an ni a, kum 1998 hnuah mahni muala Japan an la ngam loh ngai loh avangin an inringtawk hle bawk.
Mahse, Australia beisei ang ngawtin inkhel a awlsam bik lo a, Japan chuan inkhel an thunun zawk - heti chung hian mikhual team hian goal an khung thei bik lo a, goal hmaah an vannei tawk lo.
Liverpool forward Takumi Minamino chuan first half-ah vawi hnih ngawt crossbar a tih per a, minute 80-naa a goal khung ngei tur nia lang chu Trent Sainsbury chuan goal line aṭangin a lo pet chhuak hman bawk.
Minamino aiah Mitoma
Japan-in khualmualah goal an khung thei lo a, team pahnih tan draw result-ah lungawi zir mai a ṭul dawn niin a lang hman - mahse, Japan coach Hajime Moriyasu-a'n thutlukna finthlak tak a siam.
Goal hmaa vannei tawk lo Minamino a la chhuak a, a aia langsar lo zawk Mitoma a luhtir. Brighton & Hove Albion aṭanga Belgian club Union SG-a khel mek forward a luh hian minute 84-na a ni tawh.
Mahse, Mitoma hian Japan tana goal pawimawh khung turin hun a mamawh rei lo - khelmuala hun a hman aṭanga minute ngana lekah goal a khung nghal a, Japan an sapatal.
Australia-in hun tep ter tawh takah goal an chhuah a, an rilru a hnual a, an insiamṭha hman lo - hun pek belh minute linaah Mitoma bawkin goal a khung leh a, Australia tan tho leh turin hun a awm tawh lo.
Socceroos beiseina
Australia-in March 29 zanah Saudi Arabia an lenchilh dawn a, Japan lakah chak ngat se inkhel boruak 'hot' tak tur a ni - mahse, an chak lo miau a, Saudi nena an inkhel tur hian awmzia a nei tawh lo.
Socceroos hi group B-ah pathumna an ni chiang a, group A-a pathumna nen fourth round-ah an inhmachhawn dawn. June 7-a khelh tur match hi single leg a nih dawn avangin a hmuhnawm dawn.
Fourth round inkhela chak zawk hian inter-confederation playoff an khel leh dawn a, hetah hian South American qualifier-a pangana nen World Cup hmun ruak an inchuh leh ang - a awlsam dawn lo.
Australia-in group A pathumna an hmachhawn tur erawh a la chiang rih lo thung. Group A-ah United Arab Emirates chu pathumna an ni mek a, Iraq leh Lebanon ten pathumna nih theih an la beisei bawk.
AFC World Cup Qualifier Kalphung
First round: 2022 FIFA World Cup qualification (AFC) hi first round aṭanga khelh ṭan a ni a, hetah hian team 12, FIFA ranking-a 35-46 na te home & away hmangin an inkhel a, a chak paruk chu second round an lut.
Second round: Rank 1-34 leh first round aṭanga inpetkai team 40 te an inel a, team panga zel awmin group pariatah ṭhen hran an ni a, group tina pakhatna leh pahnihna ti ṭha pali chu third round-ah an tlang.
World Cup thlengtu Qatar chu tling sa an ni a, an group-ah hmahruaitu an nih bawk si avangin an hmun ruak la awm hi pahnihna ti ṭha zinga panganain an luah zui. Second round-ah hian India chu group E-ah Qatar, Oman, Afghanistan leh Bangladesh te nen an awm ho a, pathumna niin an tlang zo ve ta lo.
Third round: Third round-ah hian team 12 an inel a, group pahnihah team paruk ve ve awmin ṭhen hran an ni - group pahniha a sang pahnih hi Qatar-a World Cup khel turin an tling a, group A aṭangin South Korea leh Iran, group B aṭangin Japan leh Saudi Arabia te an tling.
Fourth round: Third round group pahniha pathumna team ve ve chu single match khelin an inhmachhawn leh ang a, he inkhela chak zawk hian inter-confederation playoff hmangin World Cup khelh an la beisei ve leh thei a ni. Group B-ah Australia chu pathumna an ni a, group A-a pathumna tur a la chiang lo.
Hmun ruak: Asia hian 100% a chiang chuan World Cup-ah hmun ruak pali a nei a, inter-confederation playoff hmanga hmun khat an la chan theih bawk avangin an hmun chan zat hi 4.5 tiin sawi a ni ṭhin.