Vettel inlan ve thei dawn lo

Pathianni zan dar 10:30-a tlan tur Saudi Arabian Grand Prix-ah Sebastian Vettel a inlan thei dawn lo. World champion vawi li ni tawh hian hripui a kai a, nimin kha chuan a team Aston Martin a la zawm thei lo.

German driver hi season bul ṭanna Bahrain Grand Prix-ah pawh khan Covid-19 vang bawk hian a inlan thei lo. Saudi Arabia a la pan theih loh leh avangin a tan champion tumna kawng a hautak duh tawh khawp ang.

Vettel a inlan theih loh vang hian, intlansiak hmasa lama a aiawhtu Nico Hulkenberg chu a hmunruakah Aston Martin tan a tlan leh ang. Bahrain-ah khan Hulkenberg hian 17-na dinhmun a luah.

Formula 1 season tharah Ferrari an che ṭha nghal a, inelna hmasa berah an driver pahnih chu pakhatna leh pahnihnaah an thleng. Hun rei tak roreltu Mercedes chuan elphaktu an nei leh dawn ṭan niin a lang.

World champion ni lai Max Verstappen-a'n season bul ṭan fuh lo mah se insiamṭhat nghal a tum dawn. Red Bull, Mercedes leh Ferrari team te hi tun season chu na takin an inel dawn tih a chiang tawh a, car intlansiakna sang ber a hmuhnawm ang.