Andalucia Open khel tur Thiem

US Open champion hlui Dominic Thiem a dam tawh a, tunah chuan tennis court chhungah kan hmu leh thei dawn ta. Pathianni aṭanga khelh tur - ATP Challenger Tour claycourt event zinga mi Andalucia Open-ah a inlan dawn.

Kum 2021 Mallorca Open-ah khan Thiem hi a banrek a hliam, a hnu lamah tournament a la khel leh miah lo. A inkhelh loh rei avang hian world ranking-ah pawh a tlahniam viau a, number 50 a ni phak hram.

Marcella, Spain-a inelna neih turah hian wildcard an pek chu a pawm. Thiem ang bawk hian Grand Slam vawi thum champion tawh Stan Wawrinka chu wildcard pek a ni bawk, ani pawh hi hliam damhlim ve tho a ni.

Kum 28 mi Thiem chuan, "Ka inkhel lo rei ta hle a, tunah chuan tournament khel turin ka inpeih ve leh ta. Ka tan chuan tun hi hun ṭha a ni turah ka ngai," tiin a sawi a, hliam vanga hun rei tak chawlh chu hrehawm a tih thu a sawi ve bawk.

Austrian star hi kumin tir lamah khan inkhel thei tawh tura ngaih a ni. Mahse, Argentina, Brazil leh Chile rama inelna bakah ATP Masters 1000 event pahnih Indian Wells leh Miami Open aṭangin a inhnukdawk.

Clay court hi a inkhelh thiamna hmun a ni a, chuvangin hard court inelna hmasa lam khelh luih ai chuan clay court season nghah thlen a duh ta zawk, ngaiawh leh tur erawh chuan hun a mamawh deuh ang.