Bucks-in Heat an hnaih zel

NBA champion lai Milwaukee Bucks chuan nimin zing khan Washington Wizards chu 114-102 in an hneh a, season kal laiah vawi 46 an chak tlinna a ni nghal.

Eastern Conference table-ah Bucks hian pahnihna dinhmun an luah chhunzawm, an chunga awm Miami Heat aia an chak tlemna chu match khat chiah a ni, regular season chhungin an dinhmun a la inthlak danglam thei dawn.

Nimin zing Fiserv Forum-a inkhelah Bucks hian mimal chakna an hmang lo, team thawhhona ṭha chu an chak chhan a ni. Player inlan 10 zinga pariat in point an nei a, chung zinga pariat chuan point 10 an nei tling.

Inkhel dangah Phoenix Suns chuan Denver Nuggets chu 140-130 in an hneh a, season kal laia match 60 an chak tlinna niin, chak hnem ber an ni chhunzawm zel.

Western Conference hmahruaitu hian Chris Paul an chhawr thei leh tawh. Hliam vanga February thla aṭanga chawl kha a lo kir a, a match hmasaah hian minute 30 khelin point 17 a nei leh nghal, assist vawi 13 a nei bawk.

Suns hi playoff khel tura tling chiang hmasa ber an ni a, an dinhmun ṭhat hnuah pawh an inthlahdah mai chuang lo. Tun hnaiah a zawnin match sarih zet hnehna an chang leh tawh a, dan theih lohin an kal fawr mek.

NBA - Nimin Results
Indiana Pacers 103 - 133 Memphis Grizzlies
Washington Wizards 102 - 114 Milwaukee Bucks
Chicago Bulls 109 - 126 New Orleans Pelicans
Phoenix Suns 140 - 130 Denver Nuggets
Cleveland Cavaliers 104 - 117 Toronto Raptors