Beisei phak lo Raducanu

US Open champion hial a ni thei a, a hnu lamah erawh Emma Raducanu a la che fuh hleithei lo. Britain tlerawl hi Katerina Siniakova hneh loin Miami Open second round aṭangin a tla.

Raducanu a tlak lai hian, tun hnaia boruak nei lian thar Naomi Osaka erawh a chak. World number 1 hlui Simona Halep chu hliam vangin a inhnudawk thung, hmeichhe tennis huangah sang taka kal fawr thei an awm rih lo.

Nilaini zan second round inkhelah Raducanu-i'n set thumna an khelh laiin hun ṭha a nei, a service hum ni se chuan a chak ang. Mahse, service a hum thei miau lo a, inkhel inhnehtawk takah 3-6, 6-4, 7-5 in a chak lo zawkah a ṭang.

Kum 19 mi Raducanu hian kuminah match sarih a khel tawh a, heng zingah hian vawi hnih chiah hnehna a chang. Insiamṭhat a mamawh takzet a, nikuma a boruak ṭha tak nei leh leh turin clay court lamah thapui a thawh a ngai dawn.

Raducanu a tlak lai hian, amah ang bawka Britian player Heather Watson erawh a chak. Kum 2020 hnua a vawi khat nan Watson hian ranking sang 20 zinga mi a hneh ve leh chiah; 4-6, 6-3, 7-6 (7-4) in world number 20 Elina Svitolina a hneh.

Watson hian a match lehpekah chuan, seeded 22-na Belinda Bencic leh Marta Kostyuk inkhela chak zawk a hmachhawn leh ang.

Inkhel dangah Naomi Osaka chuan Angelique Kerber a hneh. World number 1 hlui pahnih an ni a, Grand Slam champion tawh ve ve an ni bawk. Player ṭha pahnih inkhelah Osaka-i'n darkar khat chhung lekin 6-2, 6-3 in hnehna a chang.

Japanese star Osaka hian a match lehpekah Karolina Muchova a tum ang. Czech Republic nula, US Open final pawh khel tawh hian second round inkhel dangah Leylah Fernandez chu 6-4, 7-6 (7-3) in a lo hneh ve bawk.

United States-ah inkhel turin Halep a zin lut a, mahse a duh loh thil a thleng. Romanian star hi a malpui a hliam a, inkhel loin a puanthuah a tel a ngai. Season hmasa khan Halep hi hliam vang bawkin a lo buai tawh.

World number 1 hlui Halep hi chawlh kar thum chhung vel chawl tura ngaih a ni. Clay court season tir lamah a inlan hman lo a nih pawhin, inelna lian French Open erawh khel hman tura ngaih a ni.

Halep ang bawkin seeded pasarihna Garbine Muguruza pawh a inhnukdawk. Spanish player hi a koki (shoulder) hliam vangin a inkhel thei lo.