World Cup-ah European champion Italy an tel dawn lo

Palermo, Italy-ah Ningani zan khan thilmak a thleng. North Macedonia-in European champion Italy chu an khawtual ngeiah 1-0 in an hneh a, Roberto Mancini hoten World Cup an khel dawn lo. Azzurri hi World Cup hnuhnung berah khan an tel tawh lo a, World Cup-a an inlan hnuhnun ber chu ni 2840 liam ta kha niin knockout stage an khelh hnuhnun ber aṭang phei chuan ni 5738 zet a ral tawh.

Playoff-ah Cristiano Ronaldo telna Portugal leh Italy te final-ah an inhmachhawn theih avangin team ṭha pakhat zawk an tla dawn tih chu thil chiang sa a ni a, amaherawhchu semifinal-a thil thleng erawhin football khawvel a barakhaih. FIFA ranking-a 67-na North Macedonia-in World Cup nomawi vawi li chawi tawh Italy an hneh hi chu a mak thlawt a ni.

Kan tling dawn
Covid-19 vangin Euro 2020 chu kum 2021 khan khelh a ni a, Roberto Mancini hnuaia harhthar Italy-in final-ah England hnehin European champion an ni. Mancini hote hi vanneih vanga champion an ni lo a, an ṭha tak tak tih nemnghehna chu Nations League finals an thlen bakah World Cup khel tur zawnnaah pawh hneh loh an tawng lo.

Football erawh a nunrawng a, team ṭha Italy meuh pawh hneh loh nei loin an tling nghal lo. Nikum November thla khan group match hnuhnung berah Northern Ireland nen goal awm loa an inhnehtawk avangin Switzerland an tlin phah.

Mancini chuan, "Playoff-ah hian ka inring tawk. World Cup nomawi hial pawh kan chawi thei ang," tiin an tlin tur thu a la sawi a, Qatar-a zin chauh ni loin champion ngei pawh a inring. Playoff-ah pawh Italy hi seeded an ni a, semifinal-ah a thlengtu an nih bawk avangin North Macedonia nena an inkhel hi final atana inpuahchahnaah a ngaih theih.

Mahse maw...
Italy-in tlarhmaah Domenico Berardi, Ciro Immobile leh Lorenzo Insigne te an dah thei a, midfield-ah Nicolo Barella, Jorginho leh Marco Verratti te an awm. Heng player-te hi Euro nomawi chawipuitute tho kha an ni a, champion ṭuma best player Gianluigi Donnarumma pawhin goal a veng.

Macedonia-ah erawh hming langsar an awm lo a, Leeds United tana khel Ezgjan Alioski chu a langsar zinga mi a ni. Kum 30 mi Alioski hi Italian ni ta se, Azzurri kawr a ha pha kher lo ang. Amaherawhchu Macedonia hian beisei an nei a, tlarhnung an tih phui ṭhat bakah Italy tlarhma an hriam lo.

Berardi-a'n keeper pass sual chang fuhin goal ruakah a khung lo. Statistics-in engkim a chiang. Italy-in 66% ball an chang a, shot pawh vawi 32 tehmeuh nei mah se goal khat pawh an khung lo. Macedonia erawh goal hmaah an vannei a, injury time-ah Alexksandar Trajkovski-a'n box pawn aṭangin a 'risk' fuh. Mikhual team an sapatal a, mualneitu Italy leh anmahni ṭantute an hawi hai thung.

Lungngaihna ruamah
Italy dinhmun hi a tawng ve lo tan chuan hriatthiam theih a ni lo. Roberto Mancini chuan, "Kan hun tawh hi a hrehawm kan tih takzet avangin kan hmalam hun ngaihtuah thei pawh kan ni lo. Nikum July thla ai khan tunah hian ka naute ka ngaihtuah zawk. Hun hrehawm tak a ni a, player-te ka tawrhpui takzet. Chutihrualin kan dinhmun chu engpawh nise ka player-te hian hmabak êng tak an nei a ni," tiin inkhelh banah a sawi.

Azzurri captain Giorgio Chiellini chuan, "Kan thinlung a keh sawm a, kan tlu sawp. Tun dinhmunah chuan thusawi tur pawh a har. Ka ṭhiante erawh ka chhuang a, kan tho chhuak leh tur a ni. Coach pawh a cham ngei ka beisei," tiin a sawi.

North Macedonia coach Blagoja Milevski chuan, "Italian lakah Italian khelh dan hmangin kan chak. Goal zawnah vawi hnih kan pet. Hnehna kan chan avangin ka lawm a, ka naute ka chhuang," tiin tlarhnung an ven ṭhat thu a sawi.

Italy hi European champion zinga World Cup khel phak lo palina an ni a, tun hmain Czechoslovakia (1978), Denmark (1994) leh Greece (2006) ten Euro nomawi an chawi zawh hlimah World Cup an khel pha tawh lo.

Portugal tan match khat a la ngai
World Cup khel turin Portugal tan match khat chak a la ngai. Cristiano Ronaldo awmna team hian Turkey 3-1 in an hneh. Thawhlehni zanah North Macedonia nen an inkhel leh ang, a chak zawkin Qatar panna ticket an
nei dawn.

Ningania zan Porto khawpuia inkhelah Portugal tan Otavio, Diogo Jota leh Matheus Nunes ten goal khat ṭheuh an khung, mikhual tana Burak Yilmaz goal khungin awmzia a nei thei ta lo. Turkey an vanduai, 2-1 a an hufual laiin penalty an hlah. Penalty an hmuh hun hi minute 85-na a ni, mahse goal hmasa khungtu Yilmaz-a'n a hlah a, si phurh sut zawh theihna remchang chu an bawhpelh. German coach Stefan Kuntz hnuaiah a vawi khat nan Turkey an chak lo a, World Cup beiseina a tawp.

Portugal coach Fernando Santos chuan, "Kan inkhel hi final vek a ni, final a nih chuan thil hi hriatthiam a harsa ṭhin. Final hmasa pakhatah kan chak a, tunah chuan a hnuhnung zawka hnehna chang turin kan bei
leh ang. "North Macedonia hi an awlsam dawn lo, inkhel hautak hmachhawn tura kan inbuatsaih a ngai. A chhan chu anni hi Italy pet chhuaktu an ni a, engti kawng zawng mahin inkhel awlsam kan beisei thiang lo," a ti.

World Cup Playoff
Path A
Semifinal - March 24, Ningani
Wales 2 - 1 Austria
WAL : Gareth Bale 25', 51'
AUS : Marcel Sabitzer 64'

*Path A inkhel pakhat zawkah Scotland leh Ukraine inkhel tur an ni a, Russia-in Ukraine an run avangin inkhelh hun an sawn. Wales khingpui tur a la hriat loh a, playoff final khelh hun tur a la hriat loh.

Path B
Semifinal - March 24, Ningani
Russia* DISQ Poland
*DISQ - Russia hi an hrem avangin Poland-in final an lut.
Sweden 1 - 0 Czech Republic
SWE : Robin Quaison 110'

Final - March 29, Thawhlehni
Poland 12:15 AM Sweden

Path C
Semifinal - March 24, Ningani
Portugal 3 - 1 Turkey
POR : Otavio 15'; Diogo Jota 42'; Matheus Nunes 90+4'
TUR : Burak Yilmaz 65'

Italy 0 - 1 North Macedonia
MKD : Alexksandar Trajkovski 90+2'

Final - March 29, Thawhlehni
Portugal 12:15 AM North Macedonia

Note :
1. Playoff-ah hmun ruak pathum a awm a, Path tin aṭangin team khat zelin World Cup an khel ang.
2. Europe aṭanga tling tawhte: Belgium, Croatia, Denmark, England, France, Germany, Netherlands, Serbia, Spain leh Switzerland.
3. World Cup khel turin ram 19 an tling tawh. Europe aṭanga tling tawh ram 10 bakah inelna thlengtu Qatar, Asia (4) aiawh Iran, South Korea, Japan leh Saudi Arabia te, South America (4) aṭangin Ecuador, Uruguay, Brazil leh Argentina te an tling tawh a ni.