Zanin aṭangin Indian Premier League
Cricket inelnaa sum tamna ber Indian Premier League vawi 15-na chu zanin aṭangin khelh ṭan a ni dawn. Champion lai Chennai Super Kings chuan zanin dar 7:30 hian Kolkata Knight Riders an hmachhawn ang.
Captain Jadeja
Season liam taa Chennai champion puitu Mahendra Singh Dhoni chuan captain hna chu all rounder Ravindra Jadeja hnenah a hlan chhawng. Yellow brigade hian kum 2012 khan auction aṭangin Jadeja hi nuai 980 in an lalut a, tun season-a chelh tur hian nuai 1,600 zet an seng.
Kum 40 mi Dhoni hian IPL ṭan kum 2008 aṭangin Chennai-ah hian captain hna a chelh a, vawi li a champion pui. CSK ṭantuten Dhoni hi hminglem atan 'Thala' an vuahsak a, a awmzia chu hruaitu tihna a ni.
IPL-a captain champion ngun ber record neitu erawh Rohit Sharma a ni a, India captain ni lai Rohit hian Mumbai hi IPL-ah vawi nga a champion tawh. Dhoni erawh IPL la khel mah se August 15, 2020 khan ram tana inkhelh a chawlhsan.
Inkhel dangṬ
March 27, Pathianni zanah match hnih a awm dawn bawk. Tlai dar 3:30-ah Delhi Capitals leh Mumbai Indians te an inkhel ang a, zan dar 7:30-ah Punjab Kings leh Royal Challengers Bangalore te an inhmachhawn ang.
Inelna hi Covid-19 vangin hmun hrang hrangah khelh theih a ni lo a, Mumbai-a stadum pathum Wankhede Stadium, Brabourne Stadium leh DY Patil Stadium bakah MCA International Stadium, Pune-ah te khelh a ni dawn.
Inelna hi
IPL 15-ah hian team 10 an awm a, league round hi May 22-a zawh tur niin final hi ruahman dan chuan May 22, 2022-ah khelh tur a ni. Tun season-ah hian team thar pahnih Delhi Capitals leh Gujarat Titans te an awm belh.
Team dang pariatte chu Chennai Super Kings, Kolkata Knight Riders, Lucknow Super Giants, Mumbai Indians, Punjab Kings, Rajasthan Royals, Royal Challengers Bangalore leh Sunrisers Hyderabad te an ni.
IPL khelh mekah Luknow-in KL Rahul chu nuai 17 zet hlawh turin an lalut; Chennai captain Jadeja, Rishabh Pant (Delhi) leh Rohit Sharma (Mumbai) te chu nuai 16 hlawh turin an club khelhsanaten an chelh vek bawk.
Player lilamna aṭanga hlawh tam ber chu Ishan Kishna a ni a, Mumbai Indians-in nuai 1,525 sengin an lalut. Chennai-in auction-ah nuai 1400-in Deepak Chahar an chhang a, Indian bowler hian Kolkata Knight Riders a hmachhawn ang.
IPL champion tawhte
Season Champion
2008 Rajasthan Royals
2009 Deccan Chargers
2010 Chennai Super Kings
2011 Chennai Super Kings
2012 Kolkata Knight Riders
2013 Mumbai Indians
2014 Kolkata Knight Riders
2015 Mumbai Indians
2016 Sunrisers Hyderabad
2017 Mumbai Indians
2018 Chennai Super Kings
2019 Mumbai Indians
2020 Mumbai Indians
2021 Chennai Super Kings