Defoe-a'n inkhelh a chawlhsan

Tottenham Hotspur striker hlui Jermain Defoe chuan inkhelh a chawlhsan thu a puang, kum 39 mi lai a nih tawh avangin Defoe hian season 22 chhung professional football huangah hun a hmang hman a ni.

England tan Defoe-a'n match 57 a khelh aṭangin goal 20 a khung a, club hrang hrang tan match 762 a khelh chhungin goal 304 a khung hman bawk, palian tak ni lo mah se khelmual chhunga a sulhnu erawh a te lo.

Premier League bika goal 162 khungtu striker chuan, "Kum 17 mi chauh ka nih laiin professional match ka khel ṭan, chu chu 1999 kha a lo ni daih tawh. Tunah chuan ka chawlh a hun ve tawh, chawl tura thutlukna siam erawh a harsa," a ti.

Defoe chuan sawi zawmin, "Football hian ka thinlungah hmun a chang reng a, ka sulhnute ka en let chang hian ka lawmin malsawmna ka dawng nasa pawh ka inti ve hle.

"Tunah chuan hringnuna chona thar hmachhawn a lo hun ve leh ta, chumi bakah chuan chhungkua leh ṭhiante nen hun tam zawk ka hmang ve thei tawh dawn. Kum hnih lek ka nih laia ball min petu ka nu, ka duhthusam a thlen dik theih nana bul min ṭansaktu chungah lawmthu ka sawi," a ti.

Spurs legend a ni a, tuna Tottenham striker Harry Kane pawhin Defoe hnen aṭangin thil tamtak a zir ngei ang tih a chiang. England captain Kane chuan, "Striker ṭha bik, thurawn mai bakah a jersey number 18 min petu," tiin thlahna thu a ziak.

Defoe hian West Ham-ah a professional zinkawng zawh ṭanin AFC Bournemouth, Tottenham Hotspur, Portsmouth, Toronto FC, Sunderland leh Rangers tan a khel hman a, 2009-10 kha season khata goal a khung hnem ber season niin, match 43-ah goal 24 a khung a, Spurs tana a khelh lai a ni.

English striker hian 2007-08 season khan Spurs tan League Cup-ah champion nomawi a chawi a, 2020-21 season khan Rangers chu Scottish Premiership-ah a champion pui bawk.

Defoe hi club a lo khelh tawhnaah a kir fo a, Spurs, Bournemouth leh Sunderland te chu club dang tana a khelh hnuah a zawm leh vek a ni.