Zanin 7:30-ah Chanmari Vs Chhinga Veng

Mizoram Premier League champion lai Chhinga Veng chuan semifinal thawh khatnaah Chanmari FC chu 1-0 in an hneh a, zanin dar 7:30 hian Lammualah minute 90 an khel leh dawn.

MPL semifinal-ah 'away goal rule' a awm lo a, Chanmari hi goal khata an chak ve a nih chuan penalty shootout hmangin chak zawk zawn tur a ni.

A tawi zawng chuan zanin hian engkim chinfel tur a ni a, tualchhung football ngainatute tan chuan en ngei chi a ni.

Thlir let ila
Chhinga Vengin season liam ta khan semifinal-ah Chanmari FC an hneh tawh a, tun season MFA Super Cup final-ah pawh Chhingcows bawk an chak.

League round-ah team pahnih hi vawi hnih inhmachhawnin Chhinga Veng hi an intawn hmasak ṭumin an chak a, a hnuhnung zawkah goal awm loa inhnehtawkin hetah hian Chanmari hi Chawngthansanga hnuaiah an khel tawh.

First leg-ah Chhinga Veng hi MS Dawngliana penalty hmangin an chak a, Chanmari erawh midfielder Jeremy Laldinpuia hnawhchhuah a nih avangin player 10-in an khel tluan.

Chhingcows hian first leg inkhel thunun zawk mah se goal khat chauha an chak avangin an dinhmun a him lo.

A la chiang lo
Chhingcows coach Lalsangzuala Hmar chuan, "Kan khingpui hi Chanmari FC an ni a; MC-a, Dampuia leh Zama te an neih miau avangin final hi kan la sawi ngam lo hrim hrim. Goal thumte chuan chak ila, defensive game-te pawh kan khel ngam ang. Tunah erawh eng mah a la chiang lo a, kan attack ve tho a ngai dawn a ni," tiin an dinhmun a la him loh thu Vanglaini a hrilh.

Chhinga Veng hian first leg-a an chhawr theih loh Lalrinchhana, Jacob Lalrawngbawla leh Lalremruata te chu mamawh dan a zira chhawr theih turin bench-ah an dah a rinawm a, inkhel bul ṭantute an khelh ṭhat avangin an siksawi tam a rinawm lo.

Beisei nei CFC
Chanmari FC coach Chawngthan­sanga chuan, "Minute 90 chhung khelh tur a la awm a, final thlen ngei tumin training-naah pawh kan thawkrim hle," tiin beiseina sang tak an la neih thu a sawi.

CFC hian hrem vangin Jeremy-a an chhawr thei dawn lo a, Hnahthial rawlthar hian first leg-ah bul a ṭan chuang loh avangin an buai phah a rinawm loh. Tlarhnungah R. Lalawmpuia hliam vangin inlan thei dawn lo a, tawnhriat nei ṭha dang Thomas Lalengkima tan hun ṭha a inherah a ngaih theih ang.

Chanmari hian final lut turin goal an mamawh a, tun inelnaa goal ruk khung tawh Lalnunzama chuan Chawngthansanga hnuaia a vawi khat nan inkhelh bul a ṭan a rinawm.

Chawnga hian goal khungtu lam a siksawi a rinawm; Zama bakah MC Malsawmzuala, Laldampuia, Vanlalbiaa Chhangte, Lalmuanzova leh Ṭhasiama te an kawl a, engtin nge nawr a tum tih lai hi hriat châkawm lai chu a ni.

Danglamna Gatch?
Chhinga Veng FC tan first leg-ah Ivorian forward Gatch Diomande a khel ṭha em em a, Chanmari lamin dan ngaihna tak an hre lo.

Goal khung kawngah erawh Dawng­tea a hmui em em a, MPL7-ah goal riat a khung tawh avangin Chanmari tan ven uluk a ṭul dawn.

Chanmari coach Chawnga chuan, "Team anga kan ven a ṭul a, Gatch a ni emaw Dawngtea pawh ni se a vengtu apiangin an tih tur chin ṭha taka an tih chuan buaina tur kan nei lo ang," a ti.

Veng mipui an pawimawh dawn
MLA inthlan a zo tawh, party hrang hranga mi pawh tunah zet chuan veng tan 'ṭan rual' hun a ni ta!

Chanmari FC-in goal an phur zawk a, tun hnaia an inhmachhawnaa record nei chhe zawk an nih avangin mipui an mamawh zawk. Chawnga hote hian semifinal an thlen theih nana Aizawl FC an hneh ṭuma anmahni ṭantu mipui tha tho tak kha an mamawh.

Chhinga Veng pawhin ṭantu an mamawh tho. Sanga chuan, "First leg-ah ṭantu kan nei ṭha tawh a, chutih rualin Chanmari hian keini aiin ṭantu an nei ṭha zawk tho. Second leg-ah chuan khelmual chhung leh pawnah kan ṭhat zawk ka beisei a, Chhinga Veng mipui inkhel en turin ka sawm tak meuh meuh a ni," tiin a sawi.