Lyon hi team khawng ber zinga mi an ni - Pep

Manchester City chuan Thawhlehni zan khan mualneitu Lyon chu 2-2 a inhnehtawkpuiin Champions League knockout stage an lut a, English champion hian point hlawh chhuak turin ṭum hnih an siphurh an sut. Group F inkhel dangah Shakhtar Donetsk chuan khualmualah Hoffenheim chu 3-2 in an hneh a, German club knockout beiseina a tawp.

Parc Olympique Lyonnais-ah Pep Guardiola hote an leng lut a, an mualah an hneh tawh loh Lyon chuan Etihad Stadium-ah an vannei satliah lo tih an lantir. French club-in chance ṭhahnem tak an hlah hnuah Maxwel Cornel chuan minute 55-naah goal hmahruai a khung a, City-in defender Aymeric Laporte hmangin minute sarih hnuah an sut.

Cornet bawkin minute 81-naah Lyon tan khung leh mah se Sergio Aguero chuan minute hnih hnuah a sut lehnghal a, 2-2 in inkhel a tawp. City boss Pep Guardiola chuan, "Lyon kha an chak a, counter attack-ah an ṭha a, kan hmachhawn tawh team-ah chuan a khawng ber zinga mi an ni. Knockout stage thlen hi kan tum a ni a, kan thleng thei hi kan lawm. Tunah chuan pakhatna nih tumin kan bei chhunzawm ang," tiin a sawi a, a player-te rilru put hmang chu a fak tel bawk.

City hian match hnuhnung berah beisei tur nei tawh lo Hoffenheim chu an mikhual dawn. Lyon erawhin khualmualah Shakh-tar Donetsk an tlawh dawn a, knockout stage lut turin point khat tal hlawhchhuah a ngai dawn a, tla thei an la ni. Ukrainian club hian Ismaily leh Taison hmanga minute 15 chhung leka 2-0 a hma an hruai hnuah Hoffenheim-in Andrei Kramaric leh Steven Zuber hmangin sut zo mah se injury time-ah Taison-a'n chakna goal a khung.