MPL8 Qualifier New Serchhip inlan hun

Mizoram Premier League khel tur zawnna qualifier-ah vawiin hian New Serchhip an inlan dawn a, tlai dar 1:30-ah Kanan FC an hmachhawn ang. Aizawl khaw pawn club hi tawnhriat nei ṭha coach Lalchhuanawma'n (Lcha) a kaihruai dawn a, en liam theih mai an ni lo.

Kanan FC-in an match hmasa berah FC Venghnuai lakah point khat chauh an hlawh chhuak a, an match hnuhnung ber a nih tawh avangin anni tan chuan final tiha sawi theih a ni.

KFC tan loan hmanga an lak David Lalchhuanawma'n a club thar tan goal hnih a khung nghal a, Serchhip khaw club an hneh dawn a nih chuan Salem Veng tlangval hi a chet ṭhat nawn a ngai.

New Serchhip tan vawiin hi an match hmasa ber tur ni mah se Lammual leh MPL thlenga tawnhriat nei sa an kawl nual a; Lalremruata (Arapa) leh Laltlanthanga te chuan season liam ta khan Hmar Veng FC, Serchhip hmingin qualifier-ah an inlan tawh a. Tlar hmaah hian Aizawl FC tana khel ṭhin Vanchengpuia tlangval Ramengmawia a rawn inlan dawn a, tualchhung football-a hming langsar ṭhin hi Kanan FC hmaah eng ang chiaha la ṭha nge a nih tih a hriat ang.

November 27, Thawhlehni
Kanan FC 2 - 2 FC Venghnuai
KFC : David Lalchhuanawma 21' (P), 71'
FCV : K. Roluahpuia 47'; Isaac Ramfangzauva 90'
Vawiin Inkhel Tur
New Serchhip 1:30 PM Kanan FC
December 1, Inrinni
Venghnuai 1:30 PM New Serchhip