United chhanchhuaktu Fellaini

Old Trafford-a thupuangtu chuan minute thum hun pek belh a nih thu a rawn nemnghet a, hetah hian inkhel tawp se Manchester United tan Champions League knockout stage khel turin match hnuhnung berah Valencia chu an mual Mestalla Stadium-ah an draw tal a ngai. United ṭantute hlauthawng taka an awm laiin Marouane Fellaini a rawn inlar a, Romelu Lukaku ball tauh thlak sak chu striker ṭha mi ang maia la thlain goal kilah tak a pet lut a, pa danglam ve tak Jose Mourinho-a'n uchuak takin an goal khung leh knockout stage an thlen a lawm zui bawk.

Thawhlehni zan group H inkhelah Juventus-in Mario Mandzukic-a goal hmangin Valencia 1-0 in an hneh a, Manchester United-in an mikhual Youngs Boys 1-0 in an hneh bawk. Italian champion leh United-in match khat khelh hma bakah knockout an lut ve ve a, Spainish club Valencia hi pathumnaah awmin Europa League an khel dawn a, Swiss club Young Boys erawhin beisei tur an nei tawh lo.

Fergie time

Manchester United-in Sir Alex Ferguson-a hnuaiah hun tawp lama goal khung an ngah a, chuvangin he hun hi 'Fergie Time' tih a ni. Swiss club nena an inkhelh ṭum pawh hian Ferguson chuan a hmunah a thlir.

Mourinho chuan Alexis Sanchez chu squad-ah a dah lo a, Paul Pogba leh Romelu Lukaku te pawh bench-ah awmin Fred leh Marcus Rashford te chungah rinna nghah a ni thung. Old Trafford-a thil thleng erawh a ngai tho a ni a, table mawngphaha awm an hmachhawn chungin an goal nawr a na tawk lo a; Rashford leh Fellaini ten chance ṭha bik an hlah a, Fred pawhin a hun ṭha neih a hmang ṭangkai thei lo a, keeper David de Gea-a'n Michel Aebischer ball petin defender a per hnuah goal ngei tura ngaih ni mah se goalline aṭangin a beng chhuak hman.

A tawpah erawh United chhantu chu vanneihna a ni a, hun pek belh minute khatnaah Fellaini-a'n chakna goal a khung. Belgian midfielder ball lak thlak danah a kutin a fuh niin a ngaih theih a, chakna goal khungtu chuan, "Handball a ni lo a, ka kutin a fuh a nih pawhin lak thlak ka tumna lamah a per palh a ni ang," tiin tih luih tumna a neih loh thu a sawi.

Mourinho bawk

A tawpah erawh Mourinho chet dan an sawi zui a, Portuguese manager hian goal an khung chiah hian tui bottle dah khawm chu chawi kangin mual sirah a vawm.

Hemi chungchang, amah ṭantu leh sawiseltute chhangin Mourinho chuan, "Goal kan khung khan ka dam sawng sawng a ni. Min ṭantute hnena ka thuchah chu Champions League hi kum 14 ka hmachhawn tawh a, group stage ka paltlang ziah. Kum hnih ka khelh loh ṭumah erawh Europa League ka champion ve ve a ni," tiin a hnathawh chu chhuang takin a sawi.

Mourinho hian 2016–17 season khan United chu Europa League-ah a champion pui a, 2002–03 season khan FC Porto chu UEFA Cup hming a la put laiin Champions League hnuai chiah inelnaah hian a champion pui tawh bawk.