Mission Veng tan chak loh a thiang lo

Zanin dar 7:30 hian Zarkawt BCA leh Mission Veng Vikings ten Mizoram Super League semifinal Game 2 an khel dawn a, fans nei ṭha pahnih inkhel tur an nih avangin Hawla Indoor Stadium, Republic Vengthlangah entu an ṭhahnem ang.

November 22 zan khan Game 1 khelh a ni tawh a, champion lai BCA hian 94-83 in hnehna an chang; zaninah an chak nawn a nih chuan a zawnin final an lut dawn. MSL-3 champion Vikings tan erawh chak ngei a ngai tawh thung - hnehna an chang thei a nih chuan December 6 zanah Game 3 khelh a ni dawn.

Thi leh dam

Mission Veng Vikings manager H. Lalhruaitluanga chuan, "Thih leh dam kara leng kan ni a, chak ngei turin kan theihna zawng zawng kan hmang ang," tiin Vanglaini a hrilh a, hei hian an dinhmun a sawifiah viau.

Game 1-ah Mission Veng Vikings hian bul an ṭan fuh hle a, chawlhlawk hman a nih lai pawhin hmahruaitu zawk an ni. Mahse, quarter pawimawh hnuhnung pahnihah an hniam zawk a, an tawnhriat neih tlem an tuar niin an manager chuan a sawi tawh.

Vikings hian India ram sipai ṭhate basketball hmanga inelna huanga lang phak Lalhmachhuana an nei. Ramthar Veng tlangval hi an intawn hmasak ṭuma BCA player ten an dan theih lo ber a ni a, coach Reuben Lalchhandama'n a chhawr dan a thiam a ngai dawn.

Dijon Najee Farr-a'n minute a khel kim a, second half-ah a chau deuh niin a lang. Farr leh Hmachhuana te hi an inkawp fuh leh a nih ngat chuan BCA tan pawh buaina tham a tling dawn a, chutih rualin an thahrui an khek thiam a pawimawh ang.

Mission Veng tlangval Hruaia chuan, "Player zingah damlo neuh neuh chu an awm, chutihrualin hei hi chhuanlama hman theih a ni lo. Eng pawh thleng thei a ni a, kan theihtawp kan chhuah dawn a ni tawp mai," tiin a sawi.

Rinkai BCA

League round-ah BCA-in hneh loh pakhat an nei a, chu chu Vikings hi an ni. Mahse, semifinal an luh chian tawh hnua intawng an ni. Chutihrualin BCA coach Lalruatfela'n, "Kan theihtawp kan chhuah, kan vanduai vang a ni," tiin league round chungchang a sawi.

Semifinal-ah erawh Zarkawt team hian an ṭhat zia an lantir leh tawh. Cameron Anderson chu player hmuhnawm bik a ni a, court a luh aṭanga second 24 leka 3-points vawm lut thei a nihna kha tualchhung basketball ngainatu ten an la theihnghilh lo.

Virginia, United States aṭanga chah luh Anderson hi feet 6 leh inches 8 zeta sang a ni a, a pumrua a len bakah a thiam bawk avangin player hmuhnawm a ni. Ani hian MSL match khat chiah a la khel a, zan hmasa ber kha a 'tihfuh' palh mai nge a thiam tak tak tih chu a chiang ang - a bul ṭantu zingah a tel tawh rin a ni.

TBL hian tualchhung player ṭha Lalrina Renthlei leh Zonunsanga te an nei a, anni pahnih hi Player of the Night atan thlan an ni tawh; anni bakah hian tawnhriat nei ṭha Matthew Remtluanga Sailo leh Dennis Lalmuanpuia te an la nei bawk.

BCA coach Afela chuan, "Chak tlang nghal kan tum," tiin Vanglaini a hrilh. An player neih lai an khelh kim theih dawn avangin Zarkawt club hian final an lut nghal a nih pawhin a mak lo a, chutih rualin an hna a awlsam lo mai thei.