Barca player an hlawh hnem fal!
Infiamna khawvela club tinte hlawh pek dan zirchianna thar berah chuan Barcelona-in an player-te tan hlawh an seng hnem fal nalh - Catalan club player-te kum khat hlawh chawhrual hi pound maktaduai 10 chuang a ni a, sports team zingah heti zat hlawh an player-te hnena pe thei hmasa ber an ni.
Barcelona hnuai chiahah Real Madrid awmin anni hian kumtin player te pound maktaduai riat chuang ṭheuh hlawhtir ziah ang an ni; top ten-ah hian Juventus leh Manchester United an lang ve bawk a, player hlawha inseng hnem top 10 club dang zawng erawh NBA club vek an ni thung.
Italian champion Juventus hi pakuanaah an awm a, United chu 10-na an ni thung - club pahnih hian kumtin player pakhat hlawh zelah pound maktaduai ruk chuang ve ve seng ang an ni a, a la tam tham hle.
Juventus hi nikum kha chuan 32-naah daih an awm a, tun dinhmun aṭanga a lan dan chuan Cristiano Ronaldo hlawh sang tak hian nghawng thui tak a nei ang.
Hlawh hnem Barca
Barcelona player-te hian chawhrualin kumtin player pakhat zelin £10,454,259 zel hlawh ang an ni a, hei hi sem darh lehin player-te hian kar khatah £201,043 an hlawh zel ang a ni bawk - hei pawh hi record thar a ni tel nghal.
Catalan club hi kum khata player hlawh hnem ber an nih rual hian chawhrual hnua kar khata player pakhatin pound nuai hnih chuang zel an hlawh anga chhut sak theih hmasa ber an ni.
European champion Real Madrid chu Barcelona hnuai chiahah hian an awm a, Real player-te hi chawhrualin kum khatah £8,089,582 ṭheuh hlawh ang an ni a, Barcelona hi pound maktaduai hnih chuang daihin an la phak chuang lo!
Khawvel football club zinga hlawh inseng hnem pathumna ni phak Juventus chuan kum khatah player tin hi £6,726,615 zel hlawhtir ang an ni a, beisei aiin hlawh lamah Italian club an inseng nasa hle.
City chungah United!
Tun season-a Manchester City chunga an vawi khat awmna ni turin United chu Premier League club zinga player tana inseng filawr lak an ni. Manchester United player-te hi chawlhrualin kum khatah £6,534,654 ṭheuh hlawh ang an ni.
Champion lai Manchester City-in transfer bazar lama sum an sen tam ngaihtuahin hlawh lamah an inseng na tawk lo a, kumtina City player-te hlawh chawhrual zat hi £5,993,000 vel a ni a, United player te hlawh hi pound singruk velin an la phak lo.
Chelsea chuan player hlawhah kumtinin mi pakhatah £5,020,004 zel an seng ang a ni a, City nena Premier League lama inel ber Liverpool chuan player pakhat hlawhah kumtinin £4,862,963 zel sem chhuak ang an ni a, club dang ngaihtuahin an inseng na lo angreng hle.
Arsenal player-te hlawh chawhrualin pakhatin kum khatah £4,853,130 hlawh ang an ni a, Big Six an tih zingah London club leh Arsenal hmelma Tottenham Hotspur chu inseng tlem ber an ni - player tin hian kum khatah £3,515,778 ṭheuh hlawh ang an ni.
Premier League
Cardiff City chu Premier League club zinga player hlawh atana inseng tlem ber club an ni a, kum khata player pakhat in a lakluh zat hi £957,471 zel ang a ni a, Premier League club zingah pound maktaduai khat kai lo awmchhun an ni.
Everton leh West Ham ten Spurs hnaih thuak khawpin players hlawhah an inseng hnem a, Crystal Palace, Leicester City leh Southampton te pawh kum khatah an player pakhatin pound maktaduai hnih chuang a hlawh ang zel an ni phak!
Premier League club zinga sum seng tlem langsar Burnley-in kum khata an player hlawh atana an pekchhuah chawhrual hi £1,603,197 a ni a, French club langsar AS Monaco leh German club RB Leipzig-te chungah erawh an la awm tho.
Premier League club 20-in player 543 an kawl a, heng ho hlawh atana kum khata an senso belhkhawm ringawt hi £1,623,964,155 a tling a, a turu hem hem hle - English football league sang bera khel te hian chawhrualin kum khatah £2,990,726 ṭheuh zel hlawh ang an ni.
Indian Premier League
Khawvela cricket league ngaihhlut hlawh bera chhal ngam cricket lamin 'per game' anga chhut chuan sum an pe hnem ber. Season khata match 14 chiah awmna league-ah hian chawhrualin player-te chuan match khatah £274,624 zel hlawh ang an ni.
Premier League-ah season khatah match 38 a awm thung a, per match ang zawnga chhut sak chuan player pakhat hian match khatah £78,703 zel hlawh ang an ni a, IPL nen a inthlau vet vet hle.
Sports team te player hlawha sum an insen dan zirchiangtu Sporting Intelligence chuan, "Tun hnaia kum 2022 thleng daih tur television rights deal thar pound tluklehdingawn 1,96 hu an ziah avang hian sum a awlsam leh sawt a ni," an ti.
Hetihlai hian top 10-a football club ni lo zawng lanpui thei NBA hnuaiah player 439 an awm a, chawhrualin player pakhatin kum khatah £2,592,695,473 zel a hlawh ang tihna a ni.
Khawvela football league lian zual
# League hming/Ram Sum
1 Premier League, England £2.9m
2 La Liga, Spain £2.2
3 Serie A, Italy £1.5
4 Bundesliga, Germany £1.4
5 Ligue 1, France £0.9
6 Super League, China £0.8
7 Premier League, Russia £0.7
8 Süper Lig, Turkey £0.6
9 Brasileiro, Brazil £0.5
10 MLS, Canada £0.4
11 Pro League, Saudi Arabia £0.3
12 Premiership, Scotland £0.2
*Pawisa hi league-a player pakhatin kum khata an hlawh ang zela chhut a ni.
Hlawh atana inseng hnem club
# Club/League Sum
1 Barcelona, La Liga £10.5m
2 Real Madrid, La Liga £8.0
3 Oklahoma City Thunder, NBA £7.8
4 Golden State Warriors, NBA £7.8
5 Washington Wizards, NBA £7.6
6 Toronto Raptors, NBA £7.5
7 Houston Rockets, NBA £7.4
8 Miami Heat, NBA £7.0
9 Juventus, Serie A £6.7
10 Man Utd, English Premier League £6.5
Match khata player-in an hlawh hnemna league
# League Hming Hlawh zat
1 IPL £274,624
2 NFL £138,354
3 English Premier League £78,703
4 NBA £72,023
5 La Liga £57,923
6 Bundesliga £41,076
7 Serie A £39,997
8 Chinese Super League £26,640
9 Ligue 1 £26,047
10 National Hockey League £25,800
£=pound m=maktaduai