Ukraine khaw vawtah Arsenal

Arsenal leh Chelsea ten Europa League knock out stage an lut tawh a, chutihrualin group hmahruaitu an la ni chiang bik lo. Gunners hian zanin dar 11:25 hian Ukraine club Vorskla Poltava an lenchilh dawn.

Chelsea erawh zin chhuah an ngai lo, London club hian zan dar 1:30-ah PAOK an mikhual dawn a, an inhnehtawk a nih pawhin Group L hmahruaitu chu an ni chiang tawh dawn tho a ni.

Khaw vawt

Arsenal tan Group E hma­hruaitu ni tur chuan hnehna chan a la ngai a, zanin an intawnna tur hi khawchin thlir lawktu lamin an hmuh lawk dan chuan 12C aia hniam ni thei tura ngaih a ni a, 7C thleng ni thei tur angin an sawi hial - London ai chuan a vawt hle tura ngaih a ni.

Club pahnih player khaik­hin chuan Arsenal hi chak tura ngaih an ni. Mahse, an inkhelhna tur hi London nen a boruak a danglam nasa em avangin beisei loh result pawh thleng thut thei a ni; chak zawk tura rinkai bik an awm thei rih lo tihna a ni.

Ukrainian President Petro Poroshenko chuan an boruak tawn mek avangin inkhelh hun hi tihdanglam a duh thu a sawi. Mahse, European football thuneitu sang UEFA chuan an ruahman lawk anga kaltlang tur a nih thu an sawi thung.

Thuchhuah siamin UEFA chuan, "European football khelh tur a tam a, tunah chuan inkhelh hun sawn leh tih danglam a awm rih lo. Ruahman lawk anga kaltlang tur a ni," an ti. Ukraine-ah hian Arsenal fans 500 vel an zin tura ngaih a ni.

Emirates Stadium-a an intawn ṭum chuan Gunners hian 4-2 in hnehna an chang, Unai Emery naute hi Europa League bika an match hnuhnung berah erawh Sporting Lisbon nen goal lut loin an inhnehtawk thung.

Arsene Wenger thlaktu Emery kaihhruaina hnuaiah match 17 chhung chu chak loh nei loin an kaltluang ta a, inrintawkna an nei sang ang tih chu a chiang. Spanish manager hian group match hnuhnung ber khelh hmain an dinhmun tur tih chian a duh, chuvangin sa huai a ser a rinawm.

Blues an thawh a ngai

Chelsea manager thar Mau­rizio Sarri-a'n beisei aia ṭhain Premier League lamah a naute a kaihruai a, hneh loh nei loin an kaltluang rei hle. Mahse, kar tawp league match-ah Tottenham an ngam lo a, an tlawmna hmasa ber an tawng.

Spurs hneh lo hlim tan zanin hi thawhchhuahna tura hun ṭha a ni dawn. Blues mikhual tur PAOK hian knock out stage luh beiseina an la nei ve a, zanin hian hnehna an chang thei a nih chuan point ruk an nei ang, inkhel dangah Vidi an chak lo a nih chuan pahnihna ni thei dinhmunah an la ding a ni.

Italian manager Sarri hian, "Group match hnuhnung khelh hmain kan tlin a ngai," tiin a sawi lawk a, a sawi angin an tling tawh. An tlin hnuah a chung bera awm an duh thu a sawi leh a, hei vang hian player ṭha chhawr chungin mikhual an dawnsawn a rinawm.

Napoli manager Sarri hian team ṭha tak a din chho mek tih chu hriat sa a ni a, hetih lai hian tlarhma a chhawr tur a la thlangfel thei rih lo niin a lang. Real Madrid hmatawng hlui Alvaro Morata lakah rinna nghah a tum viau a, mahse Spain international hian beisei a phak lo leh ṭhin.

Tottenham lama goal khat khungtu Olivier Giroud hi Europa League lamah chhawr a ni ṭhin a, zaninah pawh a inlan a beiseiawm. Arsenal striker hlui hian goal a khung loh ṭum pawhin team tan a thawhhlawk ṭhin avangin fak a hlawh ṭhin, zanina lut zawk tan an manager tih lungawi theihna hun ṭha a ni ang.