AFC Asian Cup 2019 Coach langsar an tam dawn
Asia khawmualpuia football hmanga ram inelna sang ber AFC Asian Cup 2019 chu January 5 khian khelh ṭan a ni dawn a, India a inlan ve dawn avangin Indian football ngainatuten an ngaihven hle.
Asian football pawhin nasa taka hma a sawn avangin an inhliam te a nih ngawt loh chuan player langsar tak tak an inlan dawn tih a chiang a, European football-a player langsar tak tak hmuh tur an awm nual dawn.
Tottenham Hotspur forward Son Heung-min, Leicester City forward Shinji Okazaki, Borussia Dortmund attacking midfielder Shinji Kagawa, Newcastle United midfielder Ki Sung-yueng, Hertha Berlin forward Mathew Leckie leh Huddersfield midfielder Aaron Mooy te chu mipui mit fukna tur an ni dawn.
Mahse, ṭum danga langsar lo ṭhin coach-in ṭum dang zawng aiin tun Asian Cup awm turah ngaihven an hlawh - Europe ang pawha tawnhriat ngah tak tak coach an tam vang a ni.
A = Alberto
Group A-ah India-in UAE, Thailand leh Bahrain an awmpui a, inelna thlengtu UAE coach Alberto Zaccheroni hi he group-ah chuan coach langsar bera chhal ngam a ni.
Kum 65 mi manager hian AC Milan, Lazio, Inter Milan leh Juventus te pawh a lo enkawl tawh a, Japan a lo enkawl tawh bawk avangin Asia-ah tawnhriat a nei sa bawk.
Serie A-ah AC Milan a champion pui tawh a, an champion season-ah hian Serie A Coach of the Year atan thlan a ni bawk - tawnhriat a ngah avangin UAE-in an ṭhatpui beisei a ni.
Group A coach zingah Milovan Rajevac hi Qatar leh Algeria lo enkawl tawh a ni bawk a, coach langsar tia sawi tur erawh a ni lo.
World champion
Group B-ah coach langsar tia sawi tur an awm loh laiin group C lamah erawh World champion ni tawh Marcello Lippi leh England boss hlui Sven-Göran Eriksson te an awm thung.
China coach Marcello Lippi hian Napoli, Inter Milan leh Juventus enkawl tawhin Serie A leh Champions League nomawi a lo chawi tawh a, Italy chu World Cup-ah a champion pui tawh bawk.
Sven-Goran Eriksson hming inhrilh nawn kan ngai lo. AS Roma, Benfica, Lazio, England, Manchester City, Mexico, Ivory Coast leh Leicester City enkawl tawhtu coach hian Philippines a kaihruai dawn.
Kum 49 mi coach Paulo Bento hi Sporting Lisbon, Portugal, Cruzeiro leh Olympiakos lo enkawl tawh a nih avangin dah hniam a harsa viau bawk - South Korea a enkawl.
Real boss hlui
Carlos Queiroz hoin Iran an inlan leh dawn a, Real Madrid boss hlui hian Sporting Lisbon, Portugal, South Africa leh Manchester United (assistant) a enkawl tawh avangin hriat loh a harsa.
Saudi Arabia coach Juan Antonio Pizzi hi player a nih laia Barcelona tana khel tawh, Valencia leh Chile lo enkawl tawh a nih avangin dah hniam a harsa.
Uzebekisktan boss Hector Cuper hi World Cup khelh zawh taka Egypt coach kha a ni a, Valencia, Real Betis leh Parma a lo enkawl tawh bawk avangin coach hriat hlawh a ni.
Iraq boss Srecko Katanec hi coach langsar tia sawi atan chuan a harsa a, mahse Olympiakos leh an ram team Slovenia lo enkawl tawh a nih avangin tawnhriat nei tlem zek zawk a ni lo.