Legrand Cup-ah Saron Veng FC leh Goshen FC te an champion

Legrand Cup, MFA Futsal 2021-22 Season Opening Tournament final chu March 25, Zirtawpni zan khan KK Futsal Ground, Durtlang Leitanah khelh a ni a, Futsal League-ah Saron Veng FC-in FC Thyristor 5-4 a hnehin an champion.

Division One final-ah Goshen FC, Sihphir Venghlun leh FC Muthi-te hun pangngaiah 3-3 in an inhnehtawk a, Goshen FC hi penalty shootout-ah 5-4 in an vannei ta zawk.

Champion Saron Veng
Futsal League-ah hian team 16 an awm a, group paliah ṭhen darh niin a sang ber ṭheuhin semifinal an lut. Ramhlun Venglai club FC Thyristor-in final lut turin Chhinga Veng 3-0 in an hneh a, Saron Vengin Kanan club Team Gideon chu 9-2 in an sawp bawk.

Final-ah Saron Veng FC an vannei zawk a, FC Thyristor 5-4 a hnehin an champion. Saron Veng player Vanlalthanga chu best player-ah thlan a ni.

Aizawl East I derby
Rinlawk ang ngeiin Goshen FC, Sihphir Venghlun leh FC Muthi inkhel boruak a 'hot' hle. Aizawl East I derby a thlen theih nan hian FC Muthi-in Armed Veng South 6-5 in an hneh a, Goshen FC-in Thlangtiang FC 5-3 in an hneh bawk.

League One-ah hian team 62 zet an awm a, heta zinga a ṭha pahnih inkhel hi entu pawh an tam. Sihphir Venghlun leh Muthi hi hun pangngaiah 3-3 in an inhnehtawk a, extra time-ah pawh chak zawk an awm lo. Penalty Shootout-ah Goshen 3-2 in an vannei a, an player Vanlalpeka chu best player-a thlan a ni.

Season Opening Tournament hi Eastern Electricals-in an sponsor a, anni bakah hian official partners-ah Mizoram Youth Commission leh MiSDA-te an ni a, co sponsors pahnih Aizawl Bakers Stop (Dawrpui) leh VL Machinery Tools (Dawrpui, Jail Veng) an awm bawk.

Inelna dang
April 8, 2022 aṭangin R. Dengthuama Hall-ah 'MFA Futsal League 2021-22 Season' khelh ṭan a ni dawn. Futsal League club te an inbuatsaih chhunawm a ṭul ang.

MFA Futsal League rual hian Division One Club, Womens leh Veteran tan Futsal intihsiakna buatsaih a ni dawn bawk. Hemi chungchang hrechiang duh tan MFA Futsal Secretary, Phone No. 9862647664-ah zawhfiah theih a ni.

May, 2022 hian Division One Club tan Season Ending Tournament buatsaih a ni zui bawk ang.