Kane-a'n Rooney a hnaih zel

England captain Harry Kane-a'n Three Lions tana goal khung hnem ber ni turin Wayne Rooney a hnaih zel a, Manchester United legend hi England tana goal khung hnem lamah goal li chiahin an phak tawh lo.

Inrinni zan khan friendly match-ah England chuan 2-1 in Switzerland an hneh a, Kane hian penalty hmangin chakna goal a khung - ram tan goal 49 a khungna chiah a ni a, Sir Bobby Charlton-a'n Three Lions tana a khung zat a nihrual.

Rooney-a'n ram tan match 120-ah goal 53 a khung a, Kane-a'n ram tan match 68-ah goal 49 a khung thung - Kane hi kum 28 chauh a la ni a, thil danglam tak a thleng a nih ngawt loh chuan Rooney-a record hi a khum ngei a rinawm.

Kane-a'n ram tana a goal 49-na a khung zanah hian Switzerland-in goal an khung hmasa zawk a, minute 22-naah Breel Embolo chuan goal hmahruai hi a tauh lut - hetichung hian England hi an vannei zawk tiin a sawi theih.

Wembley Stadium-a inkhelah Gareth Southgate-a'n a team enchhin a thlang a, Marc Guehi leh Kyle Walker-Peters te chu ram tana an match hmasa berah bul a ṭantir a, warm-up laia John Stones inhliam avangin Ben White chuan bul a ṭan a, Tyrick Mitchell chu bench aṭanga lutin ram tana a match hmasa ber a khel bawk.

England tan goalkeeper Jordan Pickford a khel ṭha takzet a, Everton si ban nghaktu chet ṭhat zan ni lo se Three Lions hi first half chhungin an mualpho fel der ang!

Mahse, England-in goal khat chiah an chhuah a, an vannei - first half hun pek belh minute khatnaah Fabian Frei-a chetsual zarzoin Conor Gallagher chuan Luke Shaw tan a siamsak a, United defender hian si phurh sutna goal a khung.

Minute 78-na a ni a, England-in penalty an hmu. Corner aṭanga ball kal chu Swiss midfielder Steven Zuber chuan a kutin a tawk fuh a, video assistant referee hmanga ennawn a nih hnuah Three Lions-in penalty an hmu.

Harry Kane chuan penalty hi goal-ah a chantir a, 2-1 in England an chak - Thawhlehni zan dar 12:15-ah Ivory Coast nen friendly match an khel leh ang.

March 26, Inrinni Zan
England 2 - 1 Switzerland
ENG: Luke Shaw 45+1'; Harry Kane 78'
SWI: Breel Embolo 22'