Number 1 thar tur Swiatek

Ashleigh Barty a chawlh thut avangin hmeichhe tennis ranking a danglam a ngai, a kalsan hmun ruak chu Iga Swiatek-i'n a hnawh khat dawn. Swiatek hi Polish nula zinga world number 1 ni thei hmasa ber tur a ni.

Grand Slam vawi thum champion Barty khan a zawnin chawlhkar 114 chhung number 1 dinhmun a luah. Mahse, tun hnai khan chona dang hmachawn tur la nei nia insawiin tennis a chawlhsan.

World number 1 thar tur Swiatek hi Miami Open-ah a inlan mek. Inrinni khan a khingpui Viktorija Golubic chu 6-2, 6-0 in a hneh a, tukin hian tualchhung nula Madison Brengle nen an inhmachhawn leh ang.

Kum 20 mi Swiatek chuan, "He thil hi chu ka damchhunga ka hriatreng tawh tur a ni, duhthusam kha beisei aia hmain a rawn thleng dik tihna a ni. Hnehna chan bakah number 1 ka ni dawn tih ka hriat avangin ka lawm," a ti.

WTA ranking thar hi April 4, Thawhṭanniah tihchhuah a ni ang.