Germany tan Chelsea player pahnih

Germany chuan Inrinni zan khan Rhein-Neckar Arena-ah Israel an mikhual a, Chelsea duo Kai Havertz (36’) leh Timo Werner (45+1’) te hmangin 2-0 in an chak. Hansi Flick-a hote hi World Cup khel turin an tling tawh a, March 29, Thawhlehni zan hian Netherlands nen friendly match an khel leh ang.

Friendly match a nih angin Germany-in inenchhin nan an hmang a, Marc-André ter Stegen-a'n bul a ṭan. Barcelona keeper Andre ter Stegen hi fiahin a awm lo a, second half-ah Kevin Trapp a inlan. Eintracht Frankfurt keeper Trapp hian injury time-ah Yonatan Cohen-a penalty a dang.

Caoch Flick-a'n tlarhnungah Jonathan Tah kawppui turin ram tana vawi khat khelhna Nico Schlotterbeck a thlang a, mual sirah David Raum leh Thilo Kehrer te an awm. Julian Draxler leh Julian Weigl te chu ram tana khel tura koh an nih leh hnuah bul an ṭan a, Jamal Musiala, Ilkay Gündogan leh Havertz te nen an inkawp. Tlarhmaah Werner a maltlat.

Germany-in inkhel an thunun a, goal chance pawh an ngah. Bench aṭanga lut Lukas Nmecha-a'n penatly hlawh chhuak mah se substitute Thomas Muller-a'n a khung thei lo. Kum 22 mi Schlotterbeck-a'n hun tawp dawna penalty a chawi tih loh chu a khel ṭha a, SC Freiburg defender hi Bayern Munich leh Borussia Dortmund te nen sawizawm a ni.

Hansi Flick chuan, "Kan khel ṭha a, chutihrualin injury time-ah khan goal chhuah ilang chuan kan thinur hawp ang. A pumpuia thlir chuan kan khel ṭha tlang a, player tin khelh danah kan lawm," tiin a sawi.