Senegal ngamtu Egypt tan World Cup a hnai
Africa Cup of Nations final-ah Egypt-in Senegal an ngam lo a, Mohamed Salah leh a ṭhianten mittui nen khelmual an chhuahsan - an tuar na takzet.
Hetihlai hian team pahnih hi World Cup playoff-ah an intawng leh dawn tih a chiang tawh a, inkhelh zawhah dressing room-ah mittui nen Salah-a'n thu a sawi a, "Phuba kan la tur a ni," a ti.
March thla a lo her chhuak a, team pahnih an intawng ta ngei. Mahni muala khel Egypt-in 1-0 in Senegal an hneh a, Senegal midfielder Saliou Ciss chuan an lamah inkhela goal awmchhun hi a tilut.
Hun tawp thlengin goal dang a lut lo a, Egypt an chak - Senegal khelmualah team pahnih an intawng leh dawn tih hriat erawh a ṭha a, Egypt tan phuba la fel tawha inngaih a la rem lo.
Salah vs Mane
Liverpool forward langsar pahnih Salah leh Sadio Mane te khelmualah an inlan a, tun ṭumah erawh an ram jersey ve ve hain an inlan a, hei ringawt pawh hian inkhel boruak a tisang.
Inkhel ṭan aṭanga minute lina lekah Salah zawk kan hmu a, Egyptian forward shot chu Senegal keeper Edouard Mendy chuan a lo dang per - a per hian bar a per a, chumi per leh chuan Ciss a fuh.
Ligue 2 club Nancy tana khel defender a per hnuah goal hi a lut a, Salah-a thawhrah hmangin Egypt-in hma an hruai a, stadium-a mipui thawm chu ropui tak a ni.
Mahse, goal a lut hma chungin goal dang erawh kan hmu zui lo a, beisei angin team pahnihin chance an ngah tawk lo a, Salah leh Mane pawhin an team tan tih theih an nei lo.
An la him lo
Egypt-in hnehna an chang miau a, Senegal ber kher an hneh bawk avangin, hlim pawh ni se dem viau theih an ni lo - mahse, African team ṭha hian World Cup khel turin an la tling lo tih an hriat a ṭha.
March 29 zan dar 10:30-ah team pahnih hi an intawng leh dawn a, Senegal khelmuala inlan tur an nih avangin Sadio Mane leh a ṭhianten Egypt laka comeback theih an la beisei ang.
Chutihrual chuan away goal rule hman a ni a, Senegal tana pawi thui thei chu Egypt khelmuala goal an khung lo kha a ni - chumi awmzia chu 2-1 in chak pawh ni se an tlang thei dawn lo.
A tawi zawnga sawi chuan Senegal tan goal an phurh sa nen, second leg-ah comeback a harsa tawh dawn a, Salah neitu Egypt lakah goal chhuah lo tura an fimkhur a ṭul dawn - Ghana leh Nigeria chu 0-0 in an inhnehtawk.
Inkhel dang
Africa khawmualpui World Cup qualifier inkhel ngaihven hlawh zingah Algeria an chak a, an mikhualna ramah Cameroon chu 1-0 in an hneh - a kum 46 tlinna piancham lawmtu Algeria coach Djamel Belmadi tan piancham thilpek hlu bik a ni.
Algeria tan striker tawnhriat nei ṭha Islam Slimani chuan inkhela goal awmchhun hi a khung a, Youcef Belaili freekick aṭanga ball kal chu Ajax goalkeeper Andrè Onana dan hman lohin a tauh lut.
March 29, zan dar 1:00-ah Algeria-in second leg khel turin Cameroon an mikhual leh dawn a, Cameroon tan a harsa tawh dawn.
Tunisia chuan khualmualah 1-0 in Mali an hneh bawk. Kum 21 mi Mali defender Moussa Sissako tan zan lungchhiatthlak a ni a, an lama a tih goal bakah red card a hmu bawk.
Kalphung
Africa khawmualpuiin World Cup-ah hmun panga an nei a, Confederation of African Football (CAF) hnuaia ram 54-ten hei hi an inchuh - first round aṭangin inelna an kalpui.
First round-ah hian FIFA ranking-a hniam zual ram 28-te chu an intum phawt a, double leg hmanga playoff match an khelh hnuah team chak zawk 14-te chuan second round-a team 26 chu an zawm.
Second round-ah hian team 40 chu group 10-ah, group khata team pali zel awmin ṭhen hran an ni a, an inkhelh kual vek hnuah group tina a sang berte chuan third round an lut.
Third round-a intum turte hi draw neih leh a ni a, double leg-a chak zawk team-te chu World Cup khel turin an tling dawn - CAF aṭanga World Cup khel tur an chiang thuai dawn e.
Inkhel Results
Congo DR 1 - 1 Morocco
CON: Yoane Wissa 12'
MOR: Tarik Tissoudali 76'
Cameroon 0 - 1 Algeria
ALG: Islam Slimani 40'
Mali 0 - 1 Tunisia
TUN: Moussa Sissako 36' (OG)
Egypt 1 - 0 Senegal
EGY: Saliou Ciss 4' (OG)
Ghana 0 - 0 Nigeria
March 29, Thawhlehni Zan
Senegal 10:30 PM Egypt
Nigeria 10:30 PM Ghana
Algeria 01:00 AM Cameroon
Morocco 01:00 AM Congo DR
Tunisia 01:00 AM Mali