Argentina tan Messi a inlar

Lionel Messi hoin Argentina chuan an mikhual Venezuela 3-0 in an hneh. Inrinni zing inkhelah world champion vawi hnih ni tawh tan hian Nicolas Gonzalez, Angel di Maria leh Messi ten goal khat ṭheuh an khung.

Buenos Aires-a inkhel hi Argentina tan chuan, anmahni ramah ngei Qatar World Cup hmaa an match hnuhnung ber a ni tawh ang. Fans an phur a, a tir aṭanga a tawp thlengin player an au phur ṭha hle a, an duh ang takin player an khel chhuak bawk.

World Cup khel turin tling chiang tawh mah se, coach Lionel Scaloni-a'n an boruak ṭha kaltluang lai tihtawp a duh lo a, chak tumin a player neih ṭhat a chhawr, team nghet ṭha tak nei chung ngeia Qatar pan a duh a ni.

Paris Saint-Germain tan beisei phak lo mah se La Albiceleste tan chuan Messi chu player dang daih a ni, ball a chang tamin a hlauhawm. Kum 34 mi hi World Cup-ah pawh an ram innghahna a ni dawn.

Copa America champion Argentina bakah hian Brazil, Ecuador leh Uruguay ten Qatar panna ticket an nei fel tawh. Peru, Colombia leh Chile ten pangana ni chunga playoff khelh an la beisei a, khelh hmabak match khat chauh an nei tawh.