Nagaland hnehin Mizoramin bul ṭan

Cricket inelna - Col CK Nayudu Trophy khelh laiah Mizoram mipa under 25 team chuan hnehna nen bul an ṭan. Season thar an match hmasaah hian Nagaland chu run 210 tehmeuhin an sawp.

Cuttack, Odisha a Driems Ground-a inkhelah hian Mizoram in an vaw hmasa a, an first innings-ah over 78.2 dingin run 194 an siam. Mizoram tan Jehu Anderson chuan run 66 a siam a, Sahil Reza leh F. Lalruatfela ten run 40 leh 28 an siam.

Nagaland-in vaw ve leh in, an first innings-ah run 142 chauh Mizoramin an siamtir. Mizoram tan kum 17 mi K. Vanrotlinga chuan Under 25 level a khelh vawi khatnaah wicket nga a la. F. Lalruatfela leh F. Lalmuanzuala ten wicket hnih ve ve lain Lalhriatrenga'n wicket khat a la.

Mizoramin second innings-ah run 398 an siam a. Jehu Anderson bawk che ṭhain run 192 a siam a. Zothanzuala'n run 79 siam bawkin an innings tawp lamah Lalhriatrenga leh Vanrotlinga ten run 34 leh 30 an thawh.

Nagaland second innings-ah hian Mizoram tan Naveen Gurung chuan wicket thum a la a, Vanlalremruata leh Hriatrenga ten wicket hnih ve ve lain K. Vanrotlinga leh Muanzuala ten wicket khat an la.

India ram huap inelna Col CK Nayudu Trophy hi ni li chhung khelh a ni a. Mizoram hian hnehna an chan avangin plate group-ah point ruk an hmu nghal. March 29 hian Arunachal Pradesh nen an inkhel leh dawn a, Sikkim leh Meghalaya te an la khel leh bawk ang. Plate Group aṭanga a sang pahnihte elite group-ah an kaisang ang.

Mizoram team manager Laithanzuala chuan, "Ṭhum vawrah kan vannei a, bul kan ṭan ṭhat rah kan seng a, kan naute an ding rei nen khawlum karah an player-te an chau a. An vuak ve ṭumin over 44 vel chauh an din avangin kan player-te an chau lutuk lo. Kha khan inkhelah awmzia a nei thui," a ti.