Medvedev lakah Murray a tlawm

Andy Murray-a'n beisei han nei sang viau ṭhin mah se, player ṭha pangngai lakah chuan result ṭha neih a harsat ta. Russian tlangval Daniil Medvedev lakah Britain tlangval Murray hi set la loin a tlawm.

Inrinnia second round inkhelah Medvedev hi a tir aṭangin kawng engkimah a chungnung a, world number 1 hlui lakah hian 6-4, 6-2 in a chak. Miami Open-ah hian semifinal a thleng phak a nih chuan, ranking-ah number 1 dinhmun a luah leh ang.

World number 2 Medvedev hian set khatna an khelh laiin, game thumnaah Murray-a service a chhuhsak a, hnunglam a hawi zui tawh lo. Murray hian January thla hnu lamah a zawna match hnih chak a la nei ve lo.

US Open champion lai Medvedev chuan, "Andy nena inkhelh hi chu a awlsam ngai lo. Service uluk a ngai a, ball vuak apiangah fimkhur a ngai zel bawk. Tun ṭumah chuan a vannei zawk ka ni," a ti. Zaninah Pedro Martínez nen an inhmachhawn leh ang.

Miami Open mipa singles champion lai Hubert Hurkacz pawh a chak. Hurkacz hian vawi 17 ngawt aces siam chungin Arthur Rinderknech chu 7-6 (5), 6-2 in a hneh a, nomawi humhim turin beisei a la nei zel.

Inkhel dangah world number 5 Stefanos Tsitsipas pawh a chak. Greek player hian qualifier aṭanga invaw kai J.J. Wolf chu 6-4, 6-7(5), 6-1 in a hneh hram a, hnehna chang tur hian winners vawi 37 a vaw chhuak.

Tsitsipas chuan, "A khel thei takzet, a tir aṭanga a tawp thleng kha a thawkrim a, min timangang thei hle," tiin a khingpui a fak. Jordan Thompson 6-2, 6-3 a hnehtu Alex de Minaur nen an inhmachhawn leh ang.