Aizawl FC khingpui tur Kenkre

I League khelh mekah Aizawl FC-in zanin dar 5:30 hian table mawngphaha awm Kenkre FC an hmachhawn dawn a, Championship stage khel turin Mizo club tan Kenkre hneh ngei a ṭul. AFC hian match hnih a zawna an chak hnuin an match hnuhnung berah Churchill Brothers an hneh lo.

Yan Law hote hian tun season-ah an theihna ang takin an la khel chhuak lo a, ṭum khat khelh chhuah zawhah championship stage leh relegation stage khel tur an zawn dawn avangin insiamṭhat a pawimawh hle.

Pasarihna chinin champion tur hi an khel dawn a, championship stage khel pha chin hi chu an relegate thei tawh lo tihna a ni bawk. Aizawl FC hi tun dinhmunah 10-naah an awm mek a, Kenkre hi 13-naah an awm thung.

I League-ah Mizo club che ṭha tawk lo mah se Mizo player tamna Mohammedan SC chu hmahruaitu an ni mek. Zirtawpni zan khan Mohammedan leh Gokulam Kerala ten hmahruaitu an zawng a, 1-1 in an inhnehtawk.

Vawiin Inkhel Tur
Neroca 3:00 PM Indian Arrows
Aizawl FC 5:30 PM Kenkre
Sreenidi Deccan 8:00 PM Chruchill Brothers

March 29, Thawhlehni
Real Kashmir 3:00 PM Sudeva Delhi
Gokulam Kerala 5:30 pm Rajasthan FC
Trau 8:00 PM Mohammedan SC