IPL-ah champion lai Chennai an chak lo nghal

Indian Premier League vawi 15-na chu Inrinni zan aṭang khan khelh ṭan a ni a, match hmasa berah champion lai Chennai Super Kings-in wicket rukin Kolkata Knight Riders an hneh lo. Zanin dar 7:30 hian Wankhede Stadium-ah club thar pahnih Gujarat Titans leh Luknow Super Giants te an inkhel ang.

Wankhede Stadium-a inkhelah KKR hi ṭhumvawrah an vannei a, vawm hmasak an thlang. Super Kings opener te an chesual a, Ruturaj Gaikwad-a'n run siam loin pavillion-ah a kir a, Devon Conway pawhin run thum chauh a siam.

Chennai batter-te an che thei lo a, mualpho tur hliah khuh nan MS Dhoni a che ṭha a, 'Captain Fantastic' tia sawi ṭhin hian thi loin ball 38-ah 50 runs an siam. Captain thar Ravindra Jadeja-a'n thi loin ball 28-ah 26 runs a siam a, over 20-ah 131/5 runs an siam hram.

Dhoni leh Jadeja te zarah Chennai mualphona a ziaawm a, Kolkata tan erawh target harsa a ni pha lo. KKR-in an bat meuh chuan dai a tla tawh a, bat a nuam tawh bawk. Opener Ajinkya Rahane-a'n ball 34 lekah 44 runs a siam a, hna a awlsam tawh.

Kolkata Knight Riders hian over 18.3-ah 133/4 runs an siam a, target an umpha. Man of the match erawh KKR bowler Umesh Yadav a ni a, 20 runs chauh pein wicket hnih a la. Captain Shreyas Iyer chuan, "Over tawp lama Dhoni a awm hi chuan a harsa ṭhin a, dai a tlak tawh avangin ball man ngheh a har. Chutihrualin kan bowler-te an che ṭha a, Umesh Yadav a rawn che ṭha hi ka lawm hle," tiin a sawi.

Chennai captain Jadeja chuan, "Dai a tla dawn tih a chian avangin ṭhumvawr a pawimawh a, ṭhumvawra kan vanduai avang khan chak a harsa nghal. Chutihrualin kan bowler-ten an vawm chhe lo a, batter lamin hmasawn a ṭul a ni," tiin a sawi.

Thlirna Tawi
March 26, Inrinni
Kolkata Knight Riders bt Chennai Super Kings
KKR wicket rukin an chak
CSK 131/5 (20)
MS Dhoni 59* (38)
Robin Uthappa 28 (21)
Ravindra Jadeja 26* (28)

Umesh Yadav 20/2 (4)
Varun Chakravarthy 23/1 (4)
Andre Russell 38/1 (4)

KKR 133/4 (18.3)
Ajinkya Rahane 44 (34)
Sam Billings 25 (22)
Nitish Rana 21 (17)

Dwayne Bravo 20/3 (4)
Mitchell Santner 31/1 (4)
Shivam Dube 11/0 (1)

Zanin Inkhel Tur
Gujarat Titans 7:30 PM Luknow Super Giants
March 29, Thawhlehni
Sunrisers Hyderabad 7:30 PM Rajasthan Royals