Goal nen Eriksen a lo kir

Christian Eriksen chu Denmark tan a inlan leh ta a, goal a khung nghal bawk asin! Euro 2020 khan lungphu chawl vangin khelmualah a tlu a, football a khelh leh theih chu sawi loh, a dam chhuak ang em, tih pawh sawi ngam a harsa.

Mahse, hun a kal deuh a - Serie A lamah a inkhelh rem lo mah se Premier League-ah a tan hmun a awm, club football a khelh thei avangin ram tan pawh koh a ni chhunzawm leh nghal.

A tira bul ṭantu zingah erawh a tel lo, mual a luh aṭanga minute hnih hnuah goal a khung. Denmark hi Netherlands lakah 4-2 in an tlawm, chak lo mah se Eriksen chanchin avangin Denmark hian ngaihven an hlawh.

Kum 30 mi Eriksen chuan, "Goal khung thei tura ball remchang tak ka hmu kha ka lawm, ka lo kir lehna inkhela ka hun tawn hi a lawmawm," a ti, Goal hnihna khung theihna renchang pawh a nei, mahse a ball petin goal ban a per hlauh.

Johan Cruyff Arena, Amsterdam-a inkhelah Eriksen-a'n goal a khung chiah hian thawm a ring a, an khingpui Netherlands coach Louis van Gaal pawhin kut bengin a lawmpui hial.

Inkhelah hian Dutch team tan Steven Bergwijn-a'n goal hnih a khung a, defender Nathan Ake leh forward Memphis Depay ten goal khat ve ve an khung bawk. Denmark goal pakhat zawk hi Jannik Vestergaard khung a ni thung.