Indian Super League: Bagan an chak nghal NorthEast United-in Mumbai an barakhaih

Indian football-a club inelna sang ber Indian Super League chu Zirtawpni zan khan khelh ṭan a ni ta a, ATK Mohun Bagan chuan match hmasa berah Kerala Blasters chu 1-0 in an hneh. 

Kolkata club tan Roy Krishna chuan inkhela goal awmchhun a khung a, Mizo awm lohna Bagan-in hnehna an chang. Blasters tan K. Lalṭhathanga (Puitea) leh Lalruatthara te lut mah se danglamna thlen turin hun a awm tawh lo. 

Inrinni zan inkhelah NorthEast United chuan chak tura rinkai zawk Mumbai City chu 1-0 in an hneh a, inkhela goal awmchhun hi Ghana international Kwesi Appiah-a'n penalty aṭanga a khung a ni. 

Highlander tan Lalengmawia (Apuia) leh Lalrempuia Fanai-ten inkhel bul an ṭan a, Mumbai lamah Hmingthanmawia (Valpuia) chuan bench lamah hun a hmang tluan thung. 

GMC Stadium, Bambolim-ah tun season ISL match hmasa ber chu ATK Mohun Bagan leh Kerala Blasters-ten an khel a, team pahnih hian transfer bazar-ah sum an hman nasat avangin chak tur zawk rinthiam a harsa. 

Season hmasa lama I League khel Mohun Bagan-in ATK an inzawmpui tak avangin ISL-a an season hmasa ber tiin a sawi theih a, Bagan fan-te tan chuan Zirtawpni inkhel hi a pawimawh lehzual. 

Blasters coach Kibu Vicuna chu season hmasa I League-a Mohun Bagan champion puitu a ni a, ATK leh Bagan an inzawm khan ISL-a ATK champion puitu Antonio Lopez Habas-a'n rin a hlawh zawk a, Vicuna an thlah. 

Blasters lawmah a lo tla a, Vicuna an chang. Spanish coach hian season hmasaa Bagan ang thoin Blasters hi game mawi khelhpui mah se goal erawh an hlawh chhuak zo lo a, amah duh lotu lakah Vicuna-a'n phuba a la thei lo. 

Inkhela goal awmchhun hi minute 68-naa Roy Krishna khung a ni a, season hmasaa ATK tana match 21-a goal 15 khungtu hian ISL-a hlawh hnem ber pawl a nih chhan a pholang. 

Kum 33 mi ni tawh mah se Krishna hi a tha a la 'za' reng a, season khata nuai 450 bawr vel hlawhtu striker hian match hmasa berah goal-a khung lehnghal avangin season hmasa ang thoa top scorer nih chu a mitthla ṭan derin a rinawm. 

Bagan midfielder Carl McHugh chu fak phu a ni a, Kolkata club a zawm hmaa Scottish Premiership-a Motherwell captain ni thei hi ATK-in an nomawi humhim an tumna kawngah player pawimawh a ni ang. 

Blasters tan minute 75-naah Puitea luhtir a ni a, Ruatthara chu hun tawp nan minute li a la awmah luhtir a ni bawk - Mizo player pahnih tan danglamna siam tur khawpin hun a tam tawk lo. 

Manchester City neitu City Football Group-in 65% share Mumbai City-ah an nei thar a, Indian football-a coach ṭha bera mi tam takin an ngaih     Sergio Lobera chu coach ni turin an lalut bawk. 

FC Goa boss hlui hian Goan club-a a hman thiam sa player a chhawm nual a, transfer bazar-ah a duh ang sum hman tur pek a ni - mahse, Lobera hnuaia an match hmasa berah City an chak lo tlat.

Minute 43-naah Mumbai mid-fielder pawimawh Ahmed Jahouh chu hnawhchhuah a ni a, Highlander tana khel ṭha tak midfielder Khassa Camara chu hlauhawm takin a tackle a, referee-in red card phawrh turin ngaihtuahna a seng nawn lo. 

Second half minute lina lekah NorthEast United-in penalty an hlawh chhuak zui a, League One club AFC Wimbledon aṭanga Highlander pantu Kwesi Appiah chuan goal-ah a chantir - tlem zawka khel Mumbai-in an chhanglet thei lo a, an tlawm. 

ISL-ah NorthEast United-in rin an hlawh lo a, midfielder Lalengmawia pawhin an beisei aia result ṭha an hlawhchhuah thu a sawi. Apuia chuan, "A nihna takah chuan chak kan phu hran lo a, kha aia ṭha zawka khel thei kan ni. 

"Red card an hmu kha kan vanneihpui a ni ber a, Mumbai lakah chuan draw result aia sang beisei a harsat laiin hnehna kan chang a ni," tiin an rin phak bak result an neih thu Vanglaini a hrilh. 

NorthEast United captain pali zinga mi Apuia chuan season thlirlawkin, "Season hmasa ai kha chuan beiseina erawh kan nei sang. Foreign player kan neih pawh an ṭha zawk a, Indian player pawh season hmasa aiin an ṭha," a ti. 

Highlander-ah hian I League-a Aizawl FC champion puitu Khalid Jamil chu assistant coach a ni a, AFC defender hlui Ashutosh Mehta-a awm bawk. Apuia leh Rempuia bakah Lalkhawpuimawia leh Rochharzela an awm a, anni pahnih erawh quarantine lai an nih avangin an la inlan thei lo.