Champion châk Chelsea Hmasawnna a zuang

Champion an châk em avanga nipui transfer-a pound maktaduai 200 chuang hmangtu Chelsea an insiamrem a, hma an sawn zel. Inrinni zan khan Frank Lampard-a kaihhruai Blues hian St James Park-ah inkhel thunun chungin Newcastle United 2-0 in an hneh.

Minute 10-na lekah Blues-in corner an pet a, Timo Werner leh Mason Mount ten ball an inpek kual hnuah English midfielder Mount hian hmun hlauhawm laiah tak vawrh lutin Newcastle defender Federico Fernandez-a'n an lamah a sut lut.

Chelsea-in inkhel thunun mah se minute 65-naah goal hnihna an khung chauh. Werner-a'n mual chanve zet a khalh hnuah Tammy Abraham tan ball ṭha a pe a, English striker hian a pet goal.

Frank Lampard kaihhruai Chelsea thiamna hi goal hnihin an sawifiah lo. Newcastle khelmualah Blues hian 71% ball possession an nei thei a, chance vawi 14 zet an insiam. London club hi kawng tinrengah an chungnung.

Blues hian point 18 hmuin pakhatna an ni hman a, amaherawhchu Tottenham-in Manchester City an hneh avangin a chung bera an awm chhung erawh a rei lo.

Chelsea boss chuan, "Nikum khan helai hmunah hian kan chak lo a, vanduai nawn leh pawh ka hlau hle. Kan khelh danah ka lawm a, chance ṭha kan hlah hnem erawh pawi ka ti thung. Tun hnaiah kan che ṭha a, chutihrualin inngaitlawm taka kan awm chhunzawm a ngai," tiin a sawi.

Blues tana chanchin lawmawm erawh goal khung chauh an thei lo a, goal an venghim thiam bawk. Kum 36 mi Thiago Silva aiah Antonio Rudiger a lut a, German defender hian Allan Saint-Maximin goal khung tur ṭha takin a dang. 

Newcastle nen keeper Edouard Mendy-a'n hna a ngah lo. Senegal international keeper hi London club tan inelna hrang hrangah vawi kua khel tawhin match sarihah goal a chhuah lo.

Chelsea hian Champions League-ah Thawhlehni zan dar 11:25 hian Rennes an hmachhawn dawn. Blues hi group E-ah awmin Sevilla nen point sarih ve ve an hmu a, Krasnodar leh Rennes ten point khat ve ve chauh an hmuh avangin knockout stage an luh a rinawm hle.