Liverpool an tlawm; beisei a bo lo

Champions League finalist Liverpool chu Nilaini zan khan Paris St-Germain lakah 1-2 in an tlawm a, away match-ah an tlawm vek tak avangin an dinhmun a derthawng hle.

PSG tan Juan Bernat leh Neymar ten goal khat ve ve an khung a, Liverpool tana a match 150-na kheltu James Milner chuan penalty hmangin chhanglet mah se goal dang an neih tawh loh avangin Liverpool an tlawm.

Merseyside club ṭantute tana thu hriat nuam tak tur erawh engkim hi an kuta awm a la ni thung. Liverpool hian an match tawp berah 1-0 a Napoli an hneh chuan last 16 an la lut thei dawn a, beiseina a la sang hle.

Napoli hian Nilaini zan inkhelah vek Liverpool-in khualmuala an ngam loh hnu Red Star Belgrade chu 3-1 in an hneh a, Dries Mertens chuan goal hnih khungin Marek Hamsik chuan goal khat a thawh ve bawk.

Liverpool boss Jurgen Klopp chuan, "Anfield kan hman ṭangkai a ngai leh dawn ta a, Anfield puihna mamawhin kan au mek a ni," a ti a, fans puihna nen Napoli lo hneh ngei a tum.

Reds aia thiam PSG
Paris khawpuia inkhelah Neymar leh Kylian Mbappe an langsar hle - ball an thiam a, an tlan chak a, an harhvang bawk si a, ball mawi tak taka inpek kual paha Liverpool tlarhnung an chhaih vel chu an hmuhnawm takzet.

Virgil van Dijk hoa tlarhnung 'nghet' tia fak hlawh Liverpool tlarhnung an ṭhiat fo a, inkhel ṭantir lamah Reds fans tan thin phut 'zawk zawkna' tur a tam hle!

Minute 13-naah Van Dijk-a chesual ta nge nge a, Dutch defender hian Mbappe ball pet a clear chiang tawk lo - Spanish left back Bernat keah tak a tla a, goal-a chantir turin harsatna a tawk lo.

Goal an chhuah hnuah Liverpool an insiamṭhat phah lo. Minute 37-naah an goal hnihna an chhuah zui a, Mbappe thawhrah bawk a ni. French rawlthar hian Edinson Cavani tan ball a pe a, Alisson chuan Cavani pet hi lo dang mah se a per lehlam chu Neymar hian goal-ah a chantir.

Goal khat chu
Liverpool-in awmze neiin PSG tlarhnung an nawr hleithei lo a, goal dang lut loin chawlhlawk an hmang mai dawn niin a lang hman. Mahse, first half hun pek belhah Sadio Mane a inlar.

Damlohna avanga PSG hmachhawn lo thei dinhmuna ding hman forward hian chak takin PSG lamah ball a tlanpui a, Angel Di Maria chuan Senegalese forward hi a lo ti tlu.

Referee-in a tirah penalty spot kawk lo mah se a assistant te a rawn hnuah penalty ni turin thutlukna a siam a, James Milner chuan Gianluigi Buffon rin lohna lamah petin chiang zetin goal-ah a chantir.

Liverpool-in beiseina thar nei mah se si phurh sutna goal erawh an nei thei tawh lo - Jurgen Klopp-a'n goal khung beiseiin Naby Keita, Xherdan Shaqiri leh Daniel Sturridge te a luhtir a, goal an keng tel bik lo.

PSG an chungnung
Inkhel pumpui thlirin PSG an chungnung zawk. French club hian tlarhmaah Cavani maltlat tirin a sir aṭangin Mbappe leh Di Maria ten an pui a, Uruguayan striker hnung chiahah Neymar a awm - Reds tlarhnung an talbuai hi a mak lo.

Midfield laiah Marco Verratti leh Marquinhos inkawp an hmuhnawm a, Italian midfielder Verratti hian vawi 51 pass a neih aṭangin 90.2% zet a pass dik a, Marquinhos hian Reds ball chan lai vawi kua ngawt a chhuhsak bawk.

Liverpool hian Verratti lakah lungawi lohna tur erawh an nei. Barcelona nena sawizawm ṭhin midfielder hian Reds defender Joe Gomez chu chiang zetin a ngalah a tlawh a, referee-in red card a phawrh ngei rin a nih laiin yellow card a phawrh.

Tlarhnunga inkawp Thiago Silva leh Presnel Kimpembe-te hming lam hmaih a thiang lo - Mohamed Salah, Mane leh Roberto Firmino te an dah 'ṭha' tih theih a ni a, an khel ṭha hle.