Tuikual South-in game 3 pumpelh an tum
Mizoram Super League semifinal game 2 chu zanin dar 7:30 hian khelh chhunzawm a ni dawn a, vawi hnih champion tawh Khatla TBL hi an match hmasa zawkah an tlawm avangin an tan chak loh a thiang tawh lo. TBL hmachhawn tur Tuikual South lamin game 3 khelh ngai loa tlang nghal an tum thung.
Tuikual South hi MSL khelh kal laia 'fans' nei ṭha ber tia chal ngam an nih avangin Hawla Indoor Stadium, Republic Vengthlangah mipui an tam leh dawn. TKS hian semifinal chak lawma lam an tum chiang a, Khatla team lamin an team au phur tur an mamawh ve dawn; hnehna an chang thei a nih chuan December 7 zanah game 3 an khel dawn a ni.
A hnai ta
Tualchhung basketball team ṭha leh hmuhnawm din mah se Tuikual South hian MSL nomawi an la chawi lo, kuminah champion an tum ruh hle. Final thleng turin vawi khat chak bak an mamawh tawh lo a, league round aṭanga an khelh chhoh dan thlir chuan tlang thei tura ngaih pawh an ni.
Phengphehlep manager Lalremsiama Hrahsel chuan, "Chak tlang kan tum, hnehna kan chan theih nan defence pawh a phui thei ang bera inrem kan tum dawn a ni," tiin Vanglaini a hrilh. Game 1-ah pawh an tlarhnung phui an ṭhat pui tawh a, an chakna lai tih chak lehzual an tum hi a mak lo.
TBL lakah point 37 score thei Desmond Antwine Medder chu an innghahna a ni leh dawn. Game 1 Player of the Night atana thlan Desmond hi TBL tan pawh dan a harsa hle tura ngaih a ni, point a lak theih bakah rebounds leh steal nei thei tak a nihna hi TKS tana thlamuanpui tham a tling.
Siamtea chuan, "Desmond hi Mizorama a rawn kal hma khan a khup hliam zai a ni a, tunah chuan a dam tawh. Team training kan neih bakah amah in a insawizawi bawk ṭhin a, inelna a hmachhawn tawh chuan a ṭha ber nih tumin hma a la ṭhin," a ti. Ruihtheih thila fihlim Desmond hi champion pui tlak khawpin a ṭha reng em tih chu game 2-ah fiah a ni dawn.
Chak a ngai
"Team tana ṭha tur a nih chuan court chhungah kan tlan dawr dawr a nga nimai lawm," tiin Khatla TBL coach cum player H. Laldinsanga chuan Vanglaini a hrilh tawh a, zaninah pawh Saron Veng tlangval Mapuia hian court chhung leh pawnah mawhphurhna lian tak a nei leh ang.
Game 1-ah khan TBL hi quarter hmasa pathumah an hnufual hle a, quarter hnuhnung berah huaisen takin an bei let thei tih an lantir. Point 15 zeta an hniamna kha point ngaah an ti thlahniam thei a, mahse a tawpah erawh holam taka 'turnover' an neih zauh ṭhin chu an tuar; an tihsualah an khingpui lamin an hrem zel thei a ni.
Khatla TBL hian thawhchhuah an duh a nih chuan Veron Young a chet nat lehzual a ngai dawn. American player Young hian match hmasa zawkah Desmond a ngam lo deuh zawk a, Mission Veng Vikings an hneh ṭuma a khelh ang khan a khelh chhuak leh a nih erawh chuan dan a harsa dawn.
Vikings captain hlui Moses Zorem-mawia'n a tihsual ṭhenkhat a siamṭha thei a nih a, a club hlui lakah Vanchuangpuia'n tualchhung player ṭha bik a nih zia a lantir thei a nih ngat chuan Khatla TBL hi an tho chhuak leh thei ang.