A tawp khar ṭhat tum Sindhu

PV Sindhu chuan a beisei leh duh anga season a hman ṭhat tawk loh zia a hrechiang a, a tawpa a thiam pariat ten an khelh tur 2018 BWF World Tour Finals-ah ṭha taka khelh a tum thu a sawi chhuak.

Inelna hi December 12 aṭangin khelh ṭan a ni dawn a, season hmasa khan Dubai-ah Sindhu hian pahnihna dinhmun a lo luah tawh. Kumin hian Guangzhou-ah inelna nghah a ni thung a, Indian shuttler hian champion a tum ruh hle.

Tun ṭum World Tour Finals hi Sindhu tan a vawi thumna a ni dawn, Rio Olympic silver medalist Sindhu chuan, "Inbuatsaihna hun ka nei tam tawk a, inrintawkna ka neih avangin ṭha taka ka khelh ngei pawh ka beisei a ni. Inelna lian leh ropuiah player ṭha rual kan intawng dawn a ni a, a hautak leh khawp ang," tiin a sawi.

Kum 23 mi Sindhu hian inelna liana pahnihna a nih fo chu a duhkhawp tawh bik lo a, champion a tum. Hei vang hian inbuatsaaihna hun a neih tam zawk theih nan Syed Modi International pawh a khelh loh phah hial a ni.