Robbie Keane a chawl ta

Republic of Ireland tana goal khung hnem ber record chelhtu Robbie Keane chuan inkhelh a chawlhsan thu a puang a, kum 38 mi niin khelmual chhung a mangṭha.

Tottenham Hotspur striker hlui hian football hrim hrim erawh a kalsan mai dawn lo. Kar hmasa khan Ireland mana­ger thar Mick McCarthy hnuaiah assistant coach a nih tur thu puan a ni tawh.

Keane chuan, "Kum 23 zet khelmuala hun duhawm tak ka hman hnuin professional footballer ka nihna aṭang chuan ka chawl dawn ta," tiin a chawlh thu hi a puang.

Zinkawng ngaihnawm

Ireland tan match 146 a khelha goal 68 khung thei Keane chuan, "Crumlin United aṭangin khawvel hmun hrang hrang Milan, London leh Los Angeles-ah te football vangin ka cheng a, ka suangtuah phak piah lam a ni.

"Dublin khawpuia football ngaina tak chunga seilian naupang hian ka beisei aia sang hun duhawm ka tawng a ni," tiin a football career-ah a lungawi tawk thu a sawi.

Keane chuan a professional career ṭanna Wolverhampton Wan­derers hnenah lawmthu sawi nghalin, "Kum 15 mi lek nia England ka pan kha hun rei tak kal ta ang mai kha a ni. Kawngpui dunga inkhel ṭhin, beiseina nena khat ka ni a, Wolves-in hun duhawm tak min pek avang khan lawmthu ka sawi a ni," a ti.

Spurs chunga lawmna

Keane hian kum 23 chhung­in club 10 tan a khel hman a, match 737 khelin goal 325 a khung a, a vanglai hun bera chhal ngam chu Spurs tan 2002-2008 a khelh kha a ni.

London club hi 2008 khan Liverpool panin a chhuahsan zawk a, mahse thlasik transfer-ah Spurs-ah hian kir lehin 2010 February thleng a khel leh hman. Tottenham tan hian match 306-ah goal 122 a khung a, Spurs Player of the Year-ah vawi thum thlan a ni.

Spurs tana League Cup vawi khat chawitu Keane chuan, "Tottenham tana ka khel thei kha ka inchhuang takzet a, match 238 chuangah captain armband ka hreng a, White Hart Lane-a ka hun hman kha chhuang takin ka thlir let ṭhin ang a, ka thinlungah hian hmun pawimawh tak a chang reng ang," a ti.

Club hrang hrangah

Keane hian Wolves-ah a career ṭanin Coventry City, Inter Milan, Leeds United, Celtic, West Ham, Aston Villa, LA Galaxy leh ATK-ah te pawh a lo khel tawh.

Irish legend chuan, "Wolves khan hun duhawm tak min pe a, Coventry, Inter leh Leeds-ah te chona thar hmachhawn turin huaisenna min pe a, khawvel huap pawha club ropui Glasgow Celtic leh Liverpool-ah te khelin ka in ang maia ka awm theihna LA Galaxy-ah te ka khel leh a ni," tiin a career chu a chhuan thu a sawi.

Keane hian LA Galaxy-ah hian season ruk hun a hmang a, match 165-a khelh sakah goal 104 khungin MLS-ah vawi thum a champion pui a, MLS Best XI-ah vawi li a lang thei a ni.

Hello India

Keane hian season hmasa khan Indian football-a boruak siam hat chungin Indian Super League club ATK a zawm a, mahse pre season tour-ah a inhliam avangin December-ah a inlan ve thei chauh.

ATK tan hian match 11 chiah khel hmanin goal riat erawh a khung sak tho a, manager Teddy Sheringham ban a nih hnua a thlakna Ashley Westwood ban a nih hnu khan player-manager hna a chelh zui.

Keane chuan, "ATK-ah khan hun duhawm tak ka hmang a, team enkawl lama ka hna hmasa ber min petu a ni bawk," tiin Indian club chu a ngaihhlut thu a sawi - Kolkata club hi a club khelhna hnuhnung ber a ni zui ta bawk.

Irish legend

Keane hian an ram team tan kum 1998 khan a match hmasa ber khelin hemi kumah hian match nga khelh sak nghalin goal hnih a khung a, 2016-a ram tan inkhelh a chawlhsan meuh chuan Ireland tan ani aia goal khung hnem an awm lo.

Irish International Player of the Year ṭum hnih ni thei Keane chuan, "Ram tana inkhelh a, captain dinhmun hial chelh kha ka career-a a mawi lai ber chu a ni. Ireland tana kum 18 ngawt ka khel thei kha ka inchhuang em em a a ni.

"Ka sawi fo ṭhin a, ka sawi leh dawn. Irish mi ni tura ka lo piang kher ka inchhuan zia hi chu thuin a hrilhfiah zo kher lo ang," a ti a, khelmual chhung football a mangṭha ta.