Mourinho-a'n Guardiola a hneh

Jose Mourinho leh Pep Guardiola te khelmual pawn aṭangin an in bei ṭan a, inkhelh hma hauhin boruak a 'hot'. Tawngkam hmanga an inbeih hnuah Inrinni zan khan Tottenham-in Manchester City 2-0 in an hneh a, Portuguese manager Mourinho-a'n contract pawtsei zo hlim Guardiola a hneh.

Premier League-ah Spurs hi hmahruaitu an ni a, chutih rualin nizan inkhelah Leicester City-in Liverpool an hneh chuan Spurs hi pahnihnaah an tla thla leh ang. Table-a an awmna chu eng pawh ni se, Pep-a enkawl Man City hnehtu Mourinho hote hi champion thei zinga mi an ni tih erawh a chiang.

Tottenham Hotspur Stadium-ah goal a lut hma. Minute ngana lekah Tanguy Ndombele-a'n fing takin ball a vir pui a, Son Heung-min tan ball fing a pe lut. South Korean star hian ṭha taka ball la thlain Ederson kap karah a khung.

Man City-in siphurh sut theihna an nei a, Gabriel Jesus-a'n ṭha taka a lakluh hnuah box chhungah tluin ball per chu Kevin De Bruyne-a'n goal-ah a pet. Belgian midfielder a vanduai - a ball pet hian offiside position-a awm Jesus a per a, Spurs an vanneih phah.

Minute 28-naah Aymeric Laporte-a'n kawh zetin a pet goal a, sawisel tur awm loah a ngaih theih. Amaherawhchu French defender ball petu Jesus-a'n ball a lak thlakna lamah ball-in a kut a per a, VAR hmanga enlet a nih hnuah pawm a ni lo.

Second half-ah Mourinho-a'n minute 65-naah substitute awmze a nei a siam a, Ndombele aiah Giovani Lo Celso a luhtir. Argentine midfielder hian minute khat pawh tling loah Harry Kane aṭanga a ball hmuh chu goal-ah a chantir a, Spurs 2-0 in an chak.

FC Porto aṭanga Chelsea a zawmtirha 'The Special One' inti ngattu Mourinho-a'n Man City lakah a special-na a pholang a, player 'special' a kawl bawk. Son Heung-min hi khawvel player ṭha ber zinga mi a ni tawh a, South Korean tlangval hian inelna sangah pawh a thiamna tak hmang chhuak turin a huaisen.

Goal khung theih vanga lar Kane hi Mourinho hnuah ball pass thiam a ni tel. England striker hian Lo Celso goal khung tur siamsak tur hian a tawk chiahin ball a khalh a, a hunah tak a tawk chiahin ball pass - midfielder ṭha bik tih ṭhin dan ang thlap a ni.

Mourinho-a'n khelh dun dan a nei a, a game plan ti hlawhtling thei tur player midfielder ṭangkai Pierre-Emile Hojbjerg a lalut. Bayern Munich chhuak Hojbjerg hi che muang deuh mah se Mourinho-a'n a ṭhatna tak a hria a, Man City laka goal an venhim theihna kawngah pawh a pawimawh hle.

Chutihrualin Spurs an vannei tel. Man City hliam damkawr Sergio Aguero leh Raheem Sterling te bench-ah an awm a, Argentine striker tel loin tlarhma a bil. Eng pawh chu ni se Inrinni zan inkhel bikah Mourinho game plan a fuh zawk.

Jose Mourinho hian Premier League nomawi vawi thum a chawi tawh a, Spurs-ah hian Kane, Son leh Gareth Bale te a kawl. Chutichung chuan Mourinho-a'n nomawi a beisei loh thu a sawi.

Spurs boss Mourinho chuan, "Season khatna kan hmang zo chauh a, nomawi chawi thei tur zinga mi kan la ni lo. Nomawi chawi kan tum lo a, match tina chak kan tum zawk. Amaherawhchu chak loh ṭum leh inhnehtawk ṭum kan nei dawn," tiin a sawi.

Manchester City manager Pep Guar-diola chuan, "Goal hmasa ber kan chhuah danah khan kan defending a ṭha tawk lo. Khami hnu kha chuan goal venhim kha an thupui ber a ni a, mi paruk an awm deuh reng a, a harsa tawh a ni. Counter attack hmangin chanve vawi hnih thum an nei a, a bak an nei lo.

"Inkhelh hmain kan sawi a, Mourinho enkawl team lakah chuan goal chhuah hmasak an thiang lo kan ti. Anni aiin chance kan nei tam a, mahse counter attack hmangin min hrem," tiin inkhelh dan chungchang a sawi.

Tottenham Hotspur hmabak a hautak hle. Spurs hian Premier League-ah Chelsea, Arsenal, Crystal Palace, Liverpool, Leicester City leh Wolverhampton Wanderers te an hmachhawn dawn.

Jose Mourinho hote hmachhawn tur zingah hian Crystal Palace tih loh hi chu season liam taa pariatna china awm vek an ni a, London club hi hun harsaah fiahin an awm. Spurs hian Ningani zan hian Europa League-ah Ludogorets an hmachhawn ang.

Manchester City erawhin Nilaini zan hian Champions League-ah Olympiakos nen an inkhel dawn a, Premier League-ah Burnley an mikhual zui ang. Pep-a hote hi Mourinho hote aiin hmabak a awlsam zawk.

Manchester City goal khung VAR hmangin hnawl a ni a, inkhel banah Kevin de Bruyne-a'n football dan hriatthiam a har a tih thu a sawi.

Belgian midfielder chuan," Kum 12 chhung professional football ka khel tawh a, a hmasa kum kaw chhungin dan thlak a awm lo. Tun hnai kum thum chhungin dan nasa takin thlak a ni a, a chhan pawh ka hrelo.

"Tunah chuan dan hi ka hrethiam tawh lo. Ka hmuh dan chuan kut chunglam a fuhin ka hriaa, dan thlak thlak hnuah chuan handball a ni lo," tiin an goal pawmsak a nih chu a lungawi lo hle.

England team atangin inhliam vangin Raheem Sterling a inhnukdawk a, Jose Mourinho chuan," Sterling angin kan inpeih lo. Anni chu kar tluanin a hahchawl. Mi tupawhin Sterling hian Spurs a hmachhawn dawn tih kan hria," tiin Man City player pawimawh chu na derah a chhuah.

Pep Guardiola chuan," Mourinho hi doctor a nih ngawt loh chuan Man City leh England team doctor be rawh se," tiin Sterling-a chungchang a sawifiah. Rilru paukhauh Mourinho-a'n inkhleh hmain Pep-a rilru chhaih buai a tum niin a lang. Inrinni zanah Sterling-a'n bul a tan lo a, minute 72-naah Riyad Mahrez thlakin result a thlak danglam thei bik lo.