Atletico leh Dortmund an tlang

UEFA Champions League group A aṭangin Atletico Madrid leh Borussia Dortmund ten knockout stage an lut a, group hmahruaitu tur erawh a la hriat loh. Atletico hian Nilaini zan khan Monaco 2-0 in an hneh a, Thierry Henry hote erawh table mawngphahah awmin Europa League an beisei thei tawh lo.

Inkhel dangah Dortmund leh Club Brugge goal awm loin an inhnehtawk a, Belgian club hian Europa League an khel ang.

Griezmann a thiam

Inkhelh ṭan aṭanga minute hnihna lekah Atletico midfielder Koke ball pet chu Benoit Badiashile chuan dang perin mualneituin hma an hruai nghal a, Spanish midfielder goal hi Champions League-a Atletico goal rang ber a ni.

Minute 24-naah Griezmann chuan Angel Correa hnen aṭanga a ball hmuh chu a ding lama lain hmun awl a hmuh velah a ke vei lama pet thutin goal mawi a khung a, box chhungah French forward a rilru a fim ṭha hle.

Hun tawp hma minute riat a la awmin Atletico Stefan Savic kutin ball a per a, hnawhchhuah a nih bakah penalty a chawi. Radamel Falcao pen chhuakin Monaco captain hian keeper bum mah se goal zawnah a pet lo.

Atletico coach Diego Simeone chuan, "Season liam taa knockout stage kan thlen loh avangin match hmasa ber aṭangin kan tihtur kan hria a, chetsual nawn kan tum lo. Hma sawn zel erawh kan mamawh," tiin a sawi.

Monaco coach Thierry Henry chuan, "Europe aṭanga kan tlak avang hian pawi tih em em tur a awm lo a, dam sawng sawngna tur a awm chuang lo. League lamah kan ngaihtuahna zawng zawng kan hman a ṭul a ni," tiin Ligue 1-a an dinhmun siam ṭhat a tum thu a sawi.

Dortmund an vanduai

Borussia Dortmund-in an mikhual Club Burgge lakah 74% hial ball chang mah se goal an khung thei lo a, point khat bak an hlawh chhuak lo. Bundesliga hmahruaitu tan hian Christian Pulisic chuan hun ṭha a bawhpelh a, chance ṭha ber erawh captain Marco Reus-a'n a hlah thung. Reus hian keeper Ethan Horvat chiah a hmachhawn hnuah a khung thei lo.

Inkhel ṭan aṭanga a tawp thlengin Dortmund-in inkhel an thunun a, second half-ah pawh Reus, Paco Alcacer leh Pulisic ten goal an khung thei lo a, bench aṭanga lut Jadon Sancho pawhin goal a keng tel lo. German club tan hmahruaitu ni tur chuan match hnuhnung berah Monaco an hneh a nih pawhin Atletico-in Club Brugge lakah point an hloh a ṭul ang.

# Team Pld W D L GF GA GD Pts
1 Atletico Madrid 5 4 0 1 9 6 3 12
2 Borussia Dortmund 5 3 1 1 8 2 6 10
3 Club Brugge 5 1 2 2 6 5 1 5
4 Monaco 5 0 1 4 2 12 -10 1