Mizoram Sub Junior Football team an chhuak

National Sub Junior Football Championship Final Round khel turin nimin khan Mizoram sub junior team chuan Mizoram an chhuahsan. Inelna hi December 2-15 chhung hian Naharlagun, Arunachal Pradesh-ah neih a ni dawn.

Mizoram hian North East Zone-ah Meghalaya leh Tripura hnehin final round an lut a, final round-ah hian team 10 an awm a ni. Team 10-te hi group pahnihah ṭhen an ni a, group-a awmte hi an inkhelh kual hnua a sang pahnih ve vein semifinal an lut ang.

Mizoram hi group B-ah Telangana, Goa, Jharkhand leh Haryana-te nen an awm ho a, group A-ah Tamilnadu, Maharashtra, Arunachal Pradesh, Odisha leh Punjab an awm thung.

Mizoram hian December 3-ah Goa nen inkhelin bul an ṭan ang a, December 5-ah Haryana an tum leh ang. December 9-ah Telangana nen inkhelin group match hnuhnung berah December 11 hian Jharkhand nen an intum leh dawn a ni.