Inter hnehtu Spurs tan beiseina

Wembley Stadium-ah Tottenham Hotspur-in substitute Christian Eriksen hmangin Inter Milan chu Nilaini zan khan 1-0 in an hneh. English club hian Champions League group match hnuhnung berah team ṭha ber Barcelona chu Nou Camp-ah an hmachhawn dawn a, hnehna an chang a nih chuan knockout stage an lut ang.

Vanneih phu

London club hian chak tumin bul an ṭan a, Harry Winks-a'n goal ban a tih per te leh Jan Vertonghen-a'n goal zawna a tauh loh te chu an chance ṭha neih a ni a, goal nawr kawngah Delle Alli a hlauhawm viau bawk. Amaherawhchu, Italian club tlarhnung a khawng ṭha a, tlarhma lamah Ivan Perisic-a'n keeper Hugo Lloris tan hna an siam sak ve tho avangin Spurs ṭantute tan ngaih ṭha taka awm a rem lo.

Wembley Stadium-ah club pahnih chhuanvawr Mauro Icardi leh Harry Kane te an langsar tawk lo, danglamna thlentu erawh substitute Eriksen a ni. Minute 10 a la awmin substitute Danish midfielder Eriksen chuan Moussa Sissoko leh Dele Alli te thawhrah sengin goal awmchhun a khung.

Spurs hian Inter Milan an tlawh ṭumin goal an khung hmasa a, amaherawhchu hun tawp dawna ṭum hnih an chetsual avangin point an hlawh chhuak zo lo. Tun ṭumah erawh a vannei zawkah an ṭang a, vannei tur pawhin theihna an nei tih Premier League-ah a lang. Mauricio Pochettino-a hote hian Manchester City an hneh loh hnuah match ruk an chak zawnna chiah a ni a, Inter Milan an hmachhawn hma chiah hian Chelsea chu 3-1 in an sawp bawk.

Beisei tur a awm

Spurs boss Mauricio Pochettino chuan, "Barcelona hi Europe-a player nei ṭha ber zinga mi a ni a, player an nei ṭha em em bawk. Catalan club hi ka zah em em a, mahse kan chak theih kan ring," tiin knockout stage luh beiseina an la neih thu a sawi.

Inter Milan hian match hnu-hnung berah PSV Eindhoven an hmachhawn dawn a, hnehna an chang a nih chuan London club hian Barcelona hi an hneh ngei a ṭul dawn. Spurs hian Italian club an tlawh ṭumin goal an khung avangin away goal rule hmangin an dinhmun a ṭha zawk a, group stage zawha an point hmuh zat a la inan chaun knockout stage lut tur zawk an ni.

Tottenham hian Pathianni zan dar 7:30 hian North London derby-ah Arsenal an hmachhawn dawn a, Gunners hian nizan khan Europa League-ah Vorskla an lenchilh a, result kan hre hman lo.

# Team Pld W D L GF GA GD Pts
1 Barcelona 5 4 1 0 13 4 9 13
2 Tottenham Hotspur 5 2 1 2 8 9 -1 7
3 Internazionale 5 2 1 2 5 6 -1 7
4 PSV 5 0 1 4 5 12 -7 1