Real chak zo lo; Atletico lakah Barca an tlawm

La Liga a ngaihnawm chhunzawm zel a, Inrinni zan khan Real Madrid leh Barcelona an chak zo lo. Real hian an mikhualna ramah Villarreal chu 1-1 in an inhnehtawkpui a, Barcelona-in 1-0 in Atletico Madrid an ngam lo thung. 

Villarreal khelmualah Mariano Díaz goal khung hmangin Real-in hma an hruai a, mahse mualneitu team-in Gerard Moreno hmanga chhangletin goal dang a lut tawh lo. 

Team talbuai Barcelona-in an hmelma Real Madrid chak zawh loh thu hre sain Atletico Madrid an lenchilh a, an mangchhia erawh an thlah thei rih chuang lo - Atletico an chak a, hmahruaitu Real Sociedad nen an point hmuh zat a in ang. 

Yannick Carrasco chuan Atletico tan inkhela goal awmchhun a khung a, Barca buaina belhchhah turin defender rinrawl Gerard Pique chu hliam vanga lakchhuah a ngai bawk. Spanish defender chawlh chen tur hi la chiang lo mah se Spanish media-te chuan thla ruk vel tal a chawlh a ngai dawn niin an sawi.  

Villarreal khelmualah Real Madrid-in goal khung turin hun an mamawh rei lo a, kum 27 mi Mariano Diaz chuan minute hnihna lekah inkhela goal awmchhun hi a khung. 

Kum 27 mi striker hian kum khat, thla ruk leh ni 16 hnua Real tana inkhel bul a ṭan leh hmasak ber a ni a, goal hmangin coach Zinedine Zidane-a rinna chu a chhanglet. 

Real Madrid youth team tana khel ṭhin Mariano hian kum 2017 khan Real chhuahsanin Lyon-a pan a, he season-ah hian match 45 khelin goal 21-a khung - Real chil a put thar leh a, an la let. 

Mahse, Real tana a kir lehna season-ah match 19 khelin goal li a khung a, season hmasa khan match sarih khelin goal khat chiah a khung.

Real-in hliam vangin striker Karim Benzema an chhawr thei lo a, Zirtawpni khan Luka Jovic chuan Covid-19 a kai tih hmuhchhuah a ni bawk - Mariano chiah hi striker chhawr tur an nei. 

Zidane-a'n loh theih lohin May 5, 2019 hnua a vawi khat nan Spanish striker a rin a ngai. Thil mak ve angreng tak chu Mariano-a'n Inrinni zan hmaa Real tana bul a ṭan hnuhnung bera a hmachhawn chu Villarreal tho a ni a, goal hnih a khung!

Inrinni zanah Villarreal lakah bawk bul a ṭan a, goal khat a khung - a hma anga goal hnih a khung theih loh avangin an chak zo lo thung. Mualneitu team-in minute 76-naah Samuel Chukwueze hmangin penalty an hlawh chhuak a, Moreno-a'n tun season La Liga-a a goal ngana ni turin a chhuih lut. 

Moreno hian chakna goal khungna remchang nei mah se goal-ah a chantir thei lo a, point khata an lungawi a ṭul. Real tan point khat hi lawmna tur ni lo mah se Benzema leh Jovic bakah Sergio Ramos leh Federico Valverde-te chu hliam vangin an inlan thei lo a, result chhe tak a ni hran lo. 

Barcelona-in an talbuaina lak ata talchhuah tumin Atletico Madrid an lenchilh a, buai lehzualna chu an thil 'hawn' a ni - first half hun pek belhah Yannick Carrasco chuan inkhela goal awmchhun a khung. Yard 40 vel aṭanga a ball khalh chu  goalkeeper Marc-Andre ter Stegen-a'n a chuh a, a bum hnuah awlsam takin goal ruakah a khung. 

International break-a zin chau Barcelona tan Lionel Messi chuan bul ṭan mah se a zinna a hlat tham deuh avangin a la chau niin a lang a, Messi meuh pawhin danglamna a thlen thei lo. 

Barca-in si phurh an sut teuh ber chu Clement Lenglet-a tauh chu a ni a, mahse goalkeeper ṭha mi Jan Oblak chuan a lo dansak. Barca an tlawm avangin La Liga table-ah 10-na an ni a, hmahruaitu Sociedad chu point kua ngawtin an thlau!

Atletico erawh inelna hrang hrangah match 24 chhung a zawnin an tlawm lo tawh a, hmahruaitu Sociedad aia match khata khel tlemin an point hmuh zat a in ang - goal an khung hnem zawk avangin Sociedad hian hma an hruai. 

Diego Simeone-a'n La Liga-ah hneh theih miah loh a nei a, chu chu Barcelona a ni - Catalan club hi vawi 18-a hmachhawn tawhah a la ngam miah lo. Inrinni zanah erawh thawnthu tih danglamin a awm ta. 

Argentine coach chuan, "Hnehna kan chan hun a her chhuak ve ta a, kan thil tum erawh kan thlak danglam phah lo ang. Khelh kan mamawh dan kan hria a, tlarhnung leh tlarhmaah rim taka kan thawh ve ve a ngai a ni," a ti. 

Barcelona-in La Liga match riat an khelh tawhah vawi thum tlawm an nei ta a, an hneh loh zingah an hmelma Real Madrid leh Atletico an tel avangin a tlawm thlak lehzual. 

Catalan club coach Ronald Koeman chuan, "Barcelona ang team tan chuan khatianga goal chhuah kha a mawi lo takzet a, kan thiam loh a ni. Khatiang thil kha a thlen nawn a thiang tawh lo ang," a ti a, an result-ah a lawm lo.