Ronaldo-a'n World Cup a khel dawn em? Zaninah a hriat dawn

Lionel Messi-a'n kumin kum tawpa khelh tur FIFA World Cup a khel dawn. Cristiano Ronaldo-a'n a khel ve dawn em, tih chu zanin hian a hriat ang. Estádio do Dragao-ah zanin dar 12:15 hian Portugal-in North Macedonia an mikhual dawn a, Ronaldo leh a ṭhiante hian hnehna an chang thei a nih chuan Qatar-ah an zin thei ang.

Euro 2016 champion Portugal hi World Cup qualifier aṭangin an inpettling nghal thei lo a, playoff an khelh a ṭul phah. Playoff final thleng tur hian Turkey 3-1 in an hneh a, North Macedonia-in European champion Italy an hnehsak bawk avangin Qatar zin kawng a awlsam sawtah a ngaih theih. Chutihrualin North Macedonia hi Portugal ang thoa World Cup khelh châka tuihal an ni tih hriat a ṭha.

Turkey hnehtu
Portugal-in playoff final thleng turin Turkey 3-1 in an hneh a, goal hnih ngawtin hnehna chang mah se nuam sain an chak lo. Turkey captain Burak Yilmaz-a'n 2-1 a nih laiin hun tawp dawnah penalty a hlah a, mualneitu Portugal-in injury time-ah Matheus Nunes hmangin an khung belh.

Fernando Santos hoten hnehna chang turin vanneihna an mamawh a, chutihrualin kim loin an khel tih hriat a ṭha. Defender pawimawh pathum Joao Cancelo, Pepe leh Ruben Dias te an khel thei lo vek.

Portugal tlarhnungah hian José Fonte kawppui turin midfielder Danilo Pereira thlan a ni a, Turkey tlarhma lakah an talbuai. North Macedonia nen erawh veteran defender Pepe bakah Cancelo te an rawn kir tawh dawn a, an ṭha sawt ang.

Italy hnehtu
North Macedonia-in football khawvel an barakhaih a, playoff semifinal-ah European champion Italy chu an mualah an luhchhuah. Injury time minute hnihnaah Alexksandar Trajkovski chuan chakna goal a khung a, Palermo-a inkhel entu mipui ṭhahnem tak an ngawi ṭhap.

World Cup-ah North Macedonia hi la inlan lo mah se tun hnaiah nasa takin hma an sawn. Euro 2020-ah khan North Macedonia hi an inlan a, inelna lian tham an inlan vawi khatnaah point hmu lo mah se vanduai theihna team an ni tih an pholang.

Tun ṭum World Cup khel tur zawnnaah pawh Germany chu an mual Duisburg-ah 2-1 in an hneh thei a, Romania chungah awmin playoff an khel pha bawk. Portugal nen hian competitive match-ah la inhmachhawn lo mah se kum 2012 khan Leiria-ah friendly match khelin goal awm loin an inhnehtawk.

Goal khung vs Goal venhim
Portugal hi team ṭha zawk an ni a, tlarhmaah Cristiano Ronaldo leh Diogo Jota te thlawp turin Bruno Fernandes leh Bernardo Silva te an awm. Heng player pali hi Premier League star-te vek kha an ni a, an ṭhatzia sawi nawn a ṭul tawh lo.

Chuvangin Fernando Santos hoten ṭan phat aṭangin attacking game an khel dawn a, an goal bawh pawh a na dawn. Mahse, an khingpui tur North Macedonia hian team chhe zawk ni chunga khelh dan an thiam. Germany leh Italy an hneh theih avangin Portugal lakah pawh beiseina sang tak an nei dawn a, World Cup nena an inkarah match khat chiah a awm tih a hre chiang bawk.

Italy an hneh ṭumin hrem vangin Eljif Elmas leh Tihomir Kostadinov te an khel thei lo a, Portugal lakaherawh an inlan thei tawh ang. Kum 22 mi Elmas hi Napoli rinrawl ni pha a ni a, feet ruka sang midfielder hi mual laiah a hnawksak khawp ang. Kum 26 mi Kostadinov erawh Europe-ah sulhnu ṭha a la nei lo a, ram tan erawh match 16 a inlan tawh.

Eng nge an sawi?
Portugal coach Fernando Santos chuan, "Kan inkhelh tur hi final a ni a, final chu a harsa ṭhin. Hetiang game harsa hi ka hmachhawn fo tawh a, chuvangin kan tawn tur hi ka hre chiang. A tawpah chuan chak zawk an awm a ngai a, chak zawk nih a pawimawh hle. Turkey kan hmachhawn ṭum ang thoin kan khingpuite zah tak chungin kan khel ang," tiin a sawi.

North Macedonia coach Blagoja Milevski chuan, "Khawvela team ṭha ber zinga mi Italy kan hneh a, hetah hian tawp kan duh lo. World Cup khel turin match khat khelh kan la mamawh. Khawvel team ṭha zingah kan tel pha ve, tih pholang turin kawng dik kan la zawh zel a ni," tiin Portugal hneh an tum thu a sawi.

World Cup Playoff

Path A
Semifinal - March 24, Ningani
Wales 2 - 1 Austria
WAL : Gareth Bale 25', 51'
AUS : Marcel Sabitzer 64'

* Path A inkhel pakhat zawkah Scotland leh Ukraine inkhel tur an ni a, Russia-in Ukraine an run avangin inkhelh hun an sawn. Wales khingpui tur a la hriat loh a, playoff final khelh hun tur a la hriat loh.

Path B

Semifinal - March 24, Ningani
Russia* DISQ Poland
* DISQ - Russia hi an hrem avangin Poland-in final an lut.
Sweden 1 - 0 Czech Republic
SWE : Robin Quaison 110'
Final - Zanin Inkhel Tur
Poland 12:15 AM Sweden

Path C

Semifinal - March 24, Ningani
Portugal 3 - 1 Turkey
POR : Otavio 15'; Diogo Jota 42'; Matheus Nunes 90+4'
TUR : Burak Yilmaz 65'

Italy 0 - 1 North Macedonia
MKD : Alexksandar Trajkovski 90+2'

Final - Zanin Inkhel Tur
Portugal 12:15 AM North Macedonia

Note :
1. Playoff-ah hmun ruak pathum a awm a, Path tin aṭangin team khat zelin World Cup an khel ang.
2. Europe aṭanga tling tawhte : Belgium, Croatia, Denmark, England, France, Germany, Netherlands, Serbia, Spain leh Switzerland.